Arabia Saudí ¿L’escenariu pa “la 33”?

19 Marzu, 2023

Aston Martin llega como’l segundu equipu de la parrilla al país del mediu Oriente, y anque Red Bull paez imbatible, si daquién puede arrinca-yos la victoria a los austríacos, Fernando Alonso ye ensin dulda el favoritu
El vienres Fernando quedar a pocu más de dos décimes de Sergio Pérez, el segundu de los de la bébora enerxético, sicasí Max Verstappen esllumó a los sos compañeros de categoría con una vuelta rellumante, que lu asitia a la mesma distancia d’Alonso, en tercer posición, que la qu’hai ente l’asturianu y Pierre Gasly, que preslla’l top 8 de la parrilla.

Entós, sabiendo que Red Bull ye tan cimeru, ¿por qué tendríamos de creer en Fernando pal güei? Pue ser que les posibilidaes de Fernando seyan baxes, pero si daqué demostraren tantu Fernando como la so nuevu monoplaza ye que dambos tienen un don como carreristes. L’AM 23 ye un coche que degrada bien poco los neumáticos, y Fernando un de los meyores pilotos en ritmu de carrera de la hestoria de la categoría. Eso sí, la degradación de los Pirelli nun foi relevante n’arabia saudí nes anteriores visites de la categoría, polo que tampocu va ser un factor decisivu, sacantes que los de Silverstone arriesguen cola estratexa.
El braeru puntu a favor de Fernando ye ensin dulda el circuitu, que siempres xeneró carreres allocaes con un montón de toques ente pilotos y alta probabilidá de Safety car. Y la trayectoria d’Alonso dexónos bien claro que ye capaz de movese comu pexe n’agua cuando les coses se ponen difíciles nun gran premiu. Amás una de les más prestoses sorpreses de la xornada foi l’home a bordu del otru Aston Martin, Llance Stroll, que quedó xusto per detrás d’Alonso, a la mesma alloñá del que los sos persiguidores, los Mercedes, polo que podemos maxinar que’l canadiense va echar un gabitu a Fernando frenando a les fleches plateaes de Hamilton y Russell y al Ferrari de Carlos Sainz.

El trazáu árabe tien munches condiciones de mancomún con otros como’l de Bakú o inclusive’l semiurbanu de Canadá, onde Fernando realizó dalgunes de les sos meyores actuaciones recién, como aquella ocasión na que, por causa de una pinchada perdió una vuelta respeutu al restu de pilotos na capital d’Azerbaiyán, pero una conducción fantástica y un gran trabayu del equipu McLaren lleváron-lu a la sétima posición n’una de les carreres mas recordaes de la era híbrida de la Fórmula Ún. Pero la braera entruga ye… ¿Va Poder Fernando Alonso, a los sos 41 años, volver metese colos Red Bull como si volviéremos tar na temporada 2010? Solo vamos sabelo dempués de la carrera , pero lo que sabemos ye que la Marea azul ta de vuelta na Fórmula Ún, coles mesmes ganes coles que los asturianos llevamos ilusionaos dende 2005.

Nel Dos Santos