Oskar Matute (Bildu), diputáu de la coalición Agora Repúbliques, representó nel Congresu los intereses asturianos gracies a los nacionaliegos asturianos, que promueven una moratoria eólica

Col envís d’asegurar la presencia de los intereses asturianos nel gobiernu estatal y gracies a la collaboración que caltienen colos diputaos d’EH Bildu al traviés de la coalición Agora Repúbliques, Andecha Astur presenta davezu entrugues nel Congresu al Gobiernu español.

Nesti casu, les entrugues ensiértense dientro la campaña que ta desendolcando la formación pa paralizar la istalación indiscriminada de torres eóliques en territoriu asturianu, que’l gobiernu de Barbón ta autorizando a llantar incluso n’importantes reserves naturales, con efeutos devastaores. 

Les entrugues presentaes nel Congresu planteguen dos cuestiones básiques, el fechu contaminante y l’allugamientu en fasteres de proteición a la biodiversidá.

Asina, faen remembrar la definición llegal de  contaminación marítima “toa introducción direuta o indireuta nelmediu marín de sustances o enerxíes de resultes de l’actividá humana, incluyíes les fontes sonores submarines, que provoquen o puedan provocar efeutos nocivos, como perxuicios a los recursos vivos y a los ecosistemes marinos –incluyida la perda de biodiversidá–, riesgos pa la salú humana, torgues a les actividaes marítimes, especialmente a la pesca, al turismu, a les actividaes d’ociu y demás usos dexaos del mar, según alteraciones de la calidá de les agües marines que llinde’l so usu y un amenorgamientu del so valor recreativu, o en términos xenerales un acabamientu del usu sostenible de los bienes y servicios marinos, incluyíos los sos recursos”, y entruguen ¿nun considera’l Gobiernu que la esplotación d’enerxía eólica con torres aeroxeneraores marines ye una actividá contaminante del ecosistema marín?

Destaquen que los Planes d’Ordenación del Espaciu Marítimu de les cinco demarcaciones marines del Estáu, regulen na mariña asturiana  trés zones d’altu potencial pa la enerxía eólica marina, nes que podríen faese instalaciones de torres aerogeneradoras, incluyíes les trés total o parcialmente dientro de reserves marítimes pal caltenimientu de la biodiversidá o, nun casu, xustamente pegada a les sos llendes. Polo qu’entruguen ¿Qué argumentos científicos y qué criterios políticos tien el Gobiernu pa considerar qu’una zona marítima d’esplotación d’enerxía eólica pue tar nel interior d’una reserva marítima pal caltenimientu de la biodiversidá?

Acordies a lo anterior, concluyen ¿nun cree’l Gobiernu que’l Real Decreto 150/2023 da prioridá a los intereses d’esplotación industrial de les empreses enerxétiques sobro la conservarión del ecosistema marín?

Ponen tamién enriba la mesa el conflictu competencial que surde de  les competencies esclusives que’l Títulu I del Estatutu d’Autonomía pa Asturies reconoz-y al Gobiernu de Asturies, ¿nun considera’l Gobiernu que’l conteníu del Real Decreto 150/2023 dio llugar a un conflictu competencial en materia d’ecosistemes, instalaciones enerxétiques y ordenación del sector pesqueru?.

Pente les aniciatives qu’acompanguen esta comparecencia nel Congresu español, destaca la presentación a Adrián Barbón d’una propuesta de moratoria eólica, sofitada con una campaña de recoyía firmes en Change.org, pidiendo a toles cofradíes asturianes de pescaores qu’asuman esta demanda. Amás, el día 31 nel Conceyu la Mocedá de Xixón cellebrarán un alderique con dellos coleutivos afeutaos.