Más del 70% de les unidaes en colexos alcordaos nes Cuenques Mineres tán siendo sovencionaes ensin necesidá. una y bones l’alumnáu podría ser asumíu pelos centros públicos esistentes ensin amontar el financiamientu, lo que supondría un aforru averáu de 24 millones d’euros
El sindicatu sostien qu’esti «repagu» enzanca la caltenibilidá económica del sistema educativu al mediu plazu.N’analizando los datos que remanan les comisiones d’escolarización y los presupuestos xenerales del Principáu, el sindicatu d’ensiñantes SUATEA llegó a la conclusión de que se ta faciendo «una xestión tremendamente ineficiente de los recursos públicos».
Concretamente, el sindicatu reparó qu’ente la Cuenca del Nalón y la del Caudal vienen alcordándose 79 unidaes ente primaria y ESO que nun son necesaries, cuidao qu’esi alumnáu tien cabida dientro de les unidaes anguañu esistentes nos centros públicos, ensin necesidá d’ampliar unidaes, construyir nuevos espacios nin de contratar más profesoráu, ello ye, a costu cero. Esto quier dicir que se gastó dineru público en caltener personal ya infracadarmes de centros de titularidá privada cuando nun facía falta.
SUATEA realizó esti analís conceyu a conceyu, de magar los datos de les comisiones d’escolarización territoriales a les que’l sindicatu tuvo accesu. Asina, detectóse que «En Llangréu hai 46 unidaes alcordaes, frente a 45 na pública (nun dexa de ser chocante que l’alministración pública punxera más güevos na cesta de lo privao que na de lo público) cuando, realmente, faen falta munches menos unidaes p’atender a tol alumnáu.» Coles 45 qu’hai na pública (ello ye, ensin invertir un solu euru más) y 15 na alcordada, podría asumise la totalidá del alumnáu del conceyu. Y, sicasí, na alcordada nun hai 15 unidaes, sinón 46, ello ye, «hai 36 unidaes adicionales que se tán pagando con dineru público ensin necesidá».
En total, de les 109 unidaes alcordaes ente dambes Cuenques, 79 tán siendo financiaes innecesariamente, esto ye, un 72% de les unidaes alcordaes tán siendo financiaes ensin necesidá. «Tamos pagando pol mesmu serviciu dos vegaes», afirmen dende’l sindicatu. «Pagamos unidaes na pública que queden ensin enllenar, y depués pagamos unidaes na rede de centros privaos calteníos con fondos públicos pa escolarizar alumnáu que tien perfecha cabida na rede pública. Ye un espilfarru de fondos públicos» que, a xuiciu de SUATEA, va poner en riesgu la estabilidá del sistema educativu al mediu plazu, «porque anque tamos d’alcuerdu en que los servicios públicos tienen de ser de baldre pal usuariu, eso nun significa que nun los pague naide, págalos l’Estáu y pa que pueda siguir financiándolos, tienen de ser caltenibles económicamente. Güeyu, eso nun significa que tengan que ser rentables, afortunadamente vivimos nun país que nun va refugar el drechu a la sanidá a un paciente con una enfermedá crónica. Tenemos escueles rurales pa que bien pocos neños puedan ser escolarizaos. Eso nunca va ser rentable nin tien que selo. Pero lo que sí hai de ser ye económicamente caltenible nel tiempu, y pa ello, la planificación económica de los servicios públicos tien de facese atendiendo a criterios de racionalidá económica. Y nun ye racional nin caltenible gastar perres en 79 unidaes que nun faen falta.» afirmen dende’l sindicatu, añediendo que «a partir de los datos publicaos nos presupuestos xenerales, pudimos calcular una cifra pa esti espilfarru de recursos públicos: 24 millones d’euros aprosimao, en 6 años».
El sindicatu denuncia esta situación agora, pos ye’l momentu nel que l’alministración educativa ta anovando los conciertos y, a xuiciu de SUATEA, «non puede mirase pa otru llau y nun tener en cuenta estes cifres».
Alberto Rodriguez
This work is licensed under a Creative Commons Attribution 4.0 International License.
