Na tardi d’ayeri una esplosión prevocó la rotura ya incendiu nel altu Fornu A d’Arcelor, forciando a evacuar la planta. Andecha Astur pidi que se despexen les incógnites alrodiu d’esti acidente y les sos consecuencies

Una perforacion del crisol paez ser la causa del incendiu, que causó graves daños materiales ya una intensa fumarea que s’espardió rapidamente, afeutando de manera especial a los barrios del Oeste xixonés, ensin que por ello s’activare’l plan d’emerxencia. El fuéu foi estinguíu dafechu pol propiu equipu de bomberos de la factoríá, una bones el serviciu de bomberos de Xixón quedó atascáu a la altura la cai Panamá nel marabayu de coches y obres prevocáu poles recientes obres, puestes en marcha pola casa conceyu de Xixón ensin iguar les correspondientes rutes d’emerxencia pa los bomberos. 

Afortunadamente, seique los daños materiales son abondos, pol momentu nun se tien costancia de daños personales. El fornu taba nel so caberu añu de vida, malque la empresa anunciare ya la so intención d’allargar el usu de la mesma un añu más de lo previsto, falándose incluso de la posibilidá de caltenelu operativu fasta’l 2026, lo qu’evidencia fasta que puntu se xuega col riesgu nestes istalaciones. 

Andecha Astur reacionó darréu pidiendo a la Conseyería d’Industria, Emplegu y Promoción Económica una investigación oficial del acidente, que s’abra una investigación oficial sol mesmu   y que, una vegá pesllá, se comuniquen los resultaos a la Xunta Xeneral y a la ciudadanía de Xixón.

A la Casa Conceyu de Xixón reclamen informes diarios sobro la contaminación del aire, que permitan, cuandu los niveles de gases y partícules lo faigan mester,  poner en marcha los niveles d’activación regulaos polos protocolos de contaminación del aire. Igualmente pidin que la Casa Conseyu ponga’n marcha un Foru Ciudadanu, nel que, cola participación d’asociaciones vecinales, partíos políticos y organizaciones ciudadanes, s’estudie la situación de Xixón en materia de calidá del aire y se valoren midíes pa dexar de ser una de les ciudades más contaminaes d’Europa.

Otra incógnita a despexar ye la manera qu’esti acidente va afeutar, y en qué midía, a los planes de sustitición del Altu Fornu A y al emplegu la plantía.

Redaición InfoAsturies

This work is licensed under a Creative Commons Attribution 4.0 International License.