Les dietes pagaes por desplazamientos n’itinerancies malamente cubren los gastos reales de desplazamientu cuando se paguen a tiempu, pero ye que amás los docentes tienen qu’alantrar el pagu fasta cuatro meses
A piques d’entamar el tercer trimestre el profesoráu itinerante sigue ensin poder presentar la lliquidación d’itinerancies dende entamu d’añu. Ello quier dicir que fasta agora ya ensin seguridá de cuando van cobralo vienen poniendo del so bolsu les perres pa pagar les itinerancies.
El sindicatu d’ensiñantes SUATEA denuncia que les perres que se paguen d’avezu por kilometros ye de por si insuficiente y nun cubre’l desgaste de los vehículos ya’l combustible. La situación agrávase cuando la Conseyería entarda más de tres meses n’actualizar el documentu que yos permitiría cobrar esi dineru, una cuestión ensin inconveniente téunicu pa l’alministración pública pero que pa los docentes de la ensiñanza pública implica un fuerte desembolsu económicu per alantre. Dende SUATEA consideren qu’esto costitui un nuevu dispreciu de la Conseyería y desixen “que se ponga remediu darréu a esta incompetencia que carga al llombu’l profesoráu, otra vuelta, la responsabilidá de caltener el sistema educativu”.
Redaición InfoAsturies
This work is licensed under a Creative Commons Attribution 4.0 International License.
