Bonos díes, bona xente.

Alborecemos col cielu nuboso o cubiertu de nubes medies y altes con unes temperatures que tan alrodiu de los 15ºC, rexistrándose nel puirtu Payares 10,6ºC.

Güei l’aire ábrigu va dir coyendo fuercia en zones de montaña onde pue tener calter moderáu a fuerte faciendo que se produzca l’efeutu foehn al pasu pela cordelera y suban bultablemente les temperatures nos valles asturianos onde puen sobrepasase los 25ºC de másima, amás mos apurrirá nubosidá media-alta que pue dexar dalguna gotera na fastera más surocidental d’Asturies. Esta situación ye caldu de cultivu pa que se propague con muncha facilidá’l fuéu nel monte polo que vos pedimos estremar les precauciones.

Mañana xueves amenorgará l’aire pa quedar sele ya variable con un descensu de les temperatures moderáu, sobre too nel llitoral y fastera central asturiana, nel cielu tendremos nubes ya claros y nun s’esperen precipitaciones.

El vienres vuelve a soplar con fuercia l’aire anque esta vegada sedrá gallegu más fríu ya humedu y va nostase sobre too nel llitoral. El cielu va tar nuboso cola posibilidá de precipitaciones febles ya disperses pela tarde.

El sábadu seguiremos baxo la mesma situación con vientu gallegu fuerte, precipitaciones febles ya disperses y dalguna nevada testimonial nes cumes de la cordelera, pudiendo baxar la cota de nieve pela tarde a los 1300m cuando’l descensu de les temperatures sedrá más evidente.

El domingu amenorgará l’aire, tendremos nubes ya claros y les temperatures van seguir descendiendo, sobre too les mínimes que van quedar perdebaxo de los 5ºC con xelaes pela cordelera.

De cara a la Selmana Santa paez que vamos tener el vientu La Cuaresma col cielu escampláu na cordelera y dalguna nube de retención de poca importancia na fastera central y llitoral con unes temperatures qu’onde nun temos al abellugu del vientu nordés van ser desagradables y fríes, sobre too peles nueches onde nes zones favoretibles va xelar.

Semeya de la nuesa collacia Ainoa del cielu típicu de los alboreceres y atapeceres con vientu ábrigu n’Asturies.