Ayeri la cuasi totalidá de les organizaciones ecoloxistes asturianes espublizaron un manifiestu conxuntu pidiendo la dimisión del Conseyeru de Mediu Rural, Alejandro Calvo, faciéndolu responsable d’una xestión llaceriosa del monte asturianu, causa principal pola qu’Asturies arde estos díes. Andecha Astur sofita esi manifiestu y pidi amás qu’Adrián Barbón dea la cara mientres Asturies arde
Amigos de la Naturaleza Asturiana, Asociación Biodevas, Asociación Ereba, Ecología y Patrimonio, Asociación Medioambiental Ecos Astures, Colectivu Ecoloxista d’Avilés, Coordinadora Ecoloxista d’Asturies, Ecoloxistes n’Aición, Geotrupes, Grupo Naturalista Mavea, Insceam, Plataforma para la Defensa de la Cordillera Cantábrica y SOS Cuideiru vienen de roblar un manifiestu desixendo la dimisión del conseyeru de Mediu Rural, Alejandro Calvo, alegando la negligente xestión de la so Conseyería nos caberos años, nos que los llabores de xixilancia, prevención ya investigación d’incendios tan siendo valeros.
Acordies los datos que manexen los ecoloxistes, apurrios pol propiu Gobiernu d’Asturies y la Fiscalía de Mediu Ambiente del TSXA l’ 80% de los incendios son prevocaos, culpando d’esti espoxigue a la eliminación de los acotaos al pastoreo, un duru golpe a la posibilidá de recuperación forestal de los terrenos quemaos qu’amás permite beneficiase que que’l monte quemen.
Andecha Astur asume dafechu’l conteníu del manifiestu ecoloxista y coincide con ellos na necesidá de dimisión d’Alejandro Calvo, plantegando a Adrián Barbón les entrugues de “por qué nun había xixilancies programaes, por qué nun s’activaron darréu tolos Axentes del Mediu Ñatural, por qué nun se cubren les vacantes de les Brigaes d’Investigación d’Incencios Forestales (BRIPAS), por qué se da aliendu a los incendiarios desatendiendo la investigación de quemes anteriores, por qué ye mester llegar a la situación d’un gobiernu que tien de pidir a los Axentes del Mediu Ñatural que camuden voluntariamente de turnu p’atender los fueos”.
Pa salir d’esta situación na que periódicamente Asturies ambura, ca vegada más que l’anterior, Andecha Astur propón tamién llínies d’actuación que permitan atayar esti grave problema. Asina,la organización presentó-y al Presidente’l Gobiernu asturianu un conxuntu de cuatru midíes urxentes, incluyendo la comparecencia na Xunta Xeneral del Presidente, Adrián Barbón, pa desplicar la situación, ente, Adrián Barbón, énte la Xunta Xeneral d’Asturies, pa desplicar la situación na que s’afayen los incendios, les midíes tomaes y los procedimientos que va poner en marcha pa investigar lo asocedío, guetar responsables y entamar reformes llegales que torguen situaciones comu la presente, asina comu una comparecencia pública del mesmu y la creación d’una mesa téunica de negociación cola Guardería del Mediu Ñatural, Brigaes d’Investigación d’Incendios Forestales (BRIPAS) y Bomberos d’Asturies, pa definir un Reglamentu téunicu sobro la prevención y xixilancia de los incendios, disposición y emplegu de recursos materiales y homanos, intervención nos incendios ya investigación de los mesmos. Aparte, ven imprescindible una declaración istitucional de la Xunta Xeneral comprometiéndose los partíos que la componen a entamar la prósima llexisllatura con una Comisión d’Investigación sobro les foles d’incendios masivos n’Asturies y l’aprebación d’una nuea Llei de Montes, “que determine procedimientos eficaces pa la llimpieza los montes, que redefina les llabores de prevención, xixilancia ya investigación d’incendios, y mecanismos alministrativos qu’aseguren la collaboración del Gobiernu asturianu na persecución del delitu d’incendiu forestal”.
Alberto Rodríguez
This work is licensed under a Creative Commons Attribution 4.0 International License.
