De les 27 sidres presentaes al concursu qu’escueye la meyor sidre ensin trasegar d’Asturies, siete fueron les escoyíes pa pasar a la final, que se celebrará el prósimu miércoles 5 d’abril na Sidrería la Montera Picona de Ramón
Güei tuvo llugar na Sidrería La Montera Picona de Ramón, la primer fase del Concursu Meyor Primer Sidre l’Añu, convocáu pola Fundación Asturies XXI en collaboración cola revista LA SIDRA. El xuráu tuvo presidíu por Manuel G. Busto, cuntándose con Alejandra Venegas como echaora.
El de la Meyor Primer Sidre L’Añu ye l’únicu concursu que tien como protagonista la sidre sobro la madre, ello ye, ensin trasegar, y nelli participaron esti añu 27 llagares.
La calidá de les sidres presentaes en xeneral foi bien curioso, lo que fexo que’l llabor del xuráu resultare enforma complicáu. A la fin, clasificárense pa la final, los llagares que vienen darréu (per orde alfabéticu, non de clasificación): Acebal (Xixón), Arbesú (Siero), Duque (Xixón), Germán (Avilés), Fonciello (Siero), Orizón (Nava) y Roza (Nava).
La sidre ganadora sedrá la oficial de la XII Primer Sidre L’Añu, y la final tendrá llugar el prósimu miércoles 5 d’abril, tamién na Sidrería La Montera Picona, de magar les 19:00 h. La mesma será abierta al públicu, que tendrá llueu la oportunidá de prebar les sidres finalistes.
Alberto Rodríguez
This work is licensed under a Creative Commons Attribution 4.0 International License.
