La decisión d’acutar llegalmente tres fasteres marítimes na costa asturiana pa llantar parques eólicos marinos xenera dudes asgaya. Poro, col envís d’esclariar un pocu les estremaes postures y consecuencies d’ello Andecha Astur aconceyó representantes d’estremaos coleutivos nuna mesa alderique que se desendolcó nos llocales del Conceyu la Mocedá, en Xixón
En representación de los pescaores, probablemente’l coleutivu más direutamente afeutáu pola posible invasión d’eólicos nel so tarrén de trabayu, acudió Maria José Rico Fernández, Secretaria Xeneral de la Federación de Cofradíes de Pescaores d’Asturies, quien apurrió abondosa información sobre les consecuencies que de llevase a cabu esti proyeutu tendría sobre la ya perxudicá flota asturiana. Remembró que non solo dañaría la biodiversidá, atacando el so mediu de vida, sinón que’l espaciu marín quedaría vedáu al pasu de barcos en dellos km cuadraos, ya que amás d’alredor de les torres ye necesario una vía d’evacuación fasta la costa, una salida a puertu y conesiones pente les torres. Pa visualizar esi datu apurrió mapes nos que se ve comu se superponen les aries destinaes a estremaos usos marinos y comu la costa queda drásticamente retayada. Na mesma cuestión abondó Mariano Suarez, qu’acudió al conceyu en representación d’Andecha Astur y quedescribió mui graficamente la estensión del problema: de les tres zones previstes una ocuparía un espaciu equivalente a tol conceyu de Nava, otru al de Navia y un terceru al de Corvera.
Mariano tamién plantegó el puntu de vista non solo ecolóxicu (les istalaciones eóliques llantaríense nun de los casos direutamente enriba d’una zona de proteición de la biodiversidá y les otres dos llendando con elles) sinón social, pol so impautu sobre les actividaes tradicionales y el trabayu na costa, destacando tamién el dañu a la soberanía alimentaria. Asturies, recordó, produz fasta un 27% más d’enerxía de la que consume, polo que ye posible reducir más entá la produción d’enerxía con medios non renovables ensin falta de recurrir a estos sistemes tan dañibles ya ensin renunciar a la soberanía enerxética. Pero sobre tou abondó en que los eólicos en si son un bon sistema de produción d’enerxía, llimpio y renovable, siempres que se llanten onde nun dañen la biodiversidá y onde los daños nun seyan superiores a los beneficios “Enerxía eólica, si, pero a cualquier preciu, non”. Nesa idega taben d’alcuerdu los cuatro participantes nel alderique.
La representación ecoloxista foi de la man d’Eneko Aierbe (Ecoloxistes n’Aición) y Fruti Pontigo (Cordinaora Ecoloxista d’Asturies). El primeru foi quien más favoratible se mostró a la implantación de parques eólicos off-shore, la modalidá propuesta p’Asturies que con torres flotantes afeutaríen menos al fondu marín, insistiendo en que nun hai información concreto sobre los sos efeutos nel mediu marín, ya que sedría’l segundu d’esta triba en costruyise, depués del de Viana do Castelo en Portugal. Pa elli el mediu marín podría beneficiase incluso, al evitase la pesca, especialmente la d’arrastre, en grandes zones. Equí hebio dellos puntos de discusión cola representante de los pescaores, quien defendió el calter respetuosu de la pesca asturiana, con namás tres arrastreros. Sicasí, Eneko tamién foi prudente a la hora de defender los eólicos, asumiendo que tendría d’estudiase perbién los sos efeutos sobre la fauna marina y les aves, teniendo pernidio que nun ye asumible llantar toes enriba zones protexies.
Más críticu colos eólicos foi Fructuoso Pontigo (Fruti), perconocíu activista en defensa la natura asturiana, representante de la Cordinaora Ecoloxista d’Asturies y voceru del Coleutivu Ecoloxista d’Avilés, del Conceyu escontra la Incineración y del coleutivu Asturies por un Aire Sanu. Tamién elli resaltó los problemes asociaos a les torres eóliques, abondando na dificultá de cuantificar el dañu sobre la biodiversidá n’espacios marinos, por casu, coles aves, unes de les principales víctimes de les aspes eóliques, remembrando que la so organización ye una de les más actives na oposición a la istalación, tamién en tierra, de torres afeutando a zones de biodiversidá y padremuñu protexios.
Tanto Mariano comu Eneko Aierbe tocaron tamién el tema de la necesaria socialización de los sistemes de produción d’enerxía, un bien, comu recalcó l’andechiegu, d’emportancia estratéxica que nun pue quedar en manes de grandes empreses privaes. Nesi sen Fruti amosose a la contra, alegando que “si ye bono ye bono y si ye malo, ye malo, seya quien fuere’l propietariu.
Toos ellos tuvieron d’alcuerdu nos efeutos negativos d’estes torres pola so contaminación lletromagnética, que perxudica, incluso mortalmente, a los cetacios y desorienta a los bancos de pexe. Tamién hubo unanimidá al defender la necesidá de diseñar una política d’enerxíes renovables respetuosa col mediu ñatural y humanu, cientrada nes necesidaes reales y que nun tea basada nel aprofitamientu de sovenciones europees.
De magar l’alderique pente los miembros de la mesa abrióse l’alderique a tolos presentes, siendo ello que les dos hores reservaes pa la charra quedaron curties ante tanta cuestión que resolver y tantes dudes que plantegar.
Redaición InfoAsturies
This work is licensed under a Creative Commons Attribution 4.0 International License.
