Esti llunes 3 de abril 24 organizaciones ambientales y animalistes convoquen una concentración pidiendo responsabilidaes pola fola d’incendios prevocaos
Pa los ecoloxistes lleva años tando nidio lo qu’agora, dempués de la fola de fuéu qu’arrasó los montes asturianos, ya naide duda: el monte nun prende solu y la mayoría de los incendios tienen un orixe inencionáu. “La sociedá tien de ser cosciente de quienes son los causantes de la gran mayoría d’estos incendios y quiénes col so silenciu, son cómplices” declaren, refiriendose tantu a los qu’entamen les quemes por porgüeyos económicos, ya seya la venta de maera, la edificación, ampliar pastos o facilitar la entrada a parques eólicos, comu a quienes cola so desidia y llacerioses polítiques permiten qu’ello ocurra.
Los llabores de prevención, xixilancia ya investigación d’incendios vienen siendo ineficaces durante los caberos años. Los retayos de los medios humanos y materiales por parte del Principado tampocu aiden. El desaniciu de les Brigaes d’ Investigación de Incendios (Bripas) impide les investigaciones necesaries pa descubrir a los responsables d’estos delitos ambientales.
Por si fore pocu , el nuevu Plan Forestal apuesta por dexar medrar más entá la superficie d’ocalitales y coníferes, árboles foriatos que faen del monte una bomba incendiaria pola so alta combustibilidá y facilidá d’espardimientu de grandes incendios.
Estes quemes finen tolos años con miles de vides animales y vexetales, poniendo’n riesgu la vida de mucha xente y ocasionando daños irreparables. Les administraciones deben poner recursos y dexar d’escondese’n de declaraciones irresponsables y valeres, aporfien los ecoloxistes.
La cita ye na tardi de güei, llunes tres d’abril, frente a la sede de Presidencia na cai Suárez de la Riva nº 11, n’Uviéu, a les 19:30.
Les organizaciones convocantes son: Movimientu Lliberación Animal Asturies, Coordinadora Ecoloxista d’Asturies, Colectivu Ecoloxista d’Avilés, Prollobos Asturies, Asociación Medioambiental la Cirigueña, Asociación de Animales con Derecho y Libertad, Coordinadora Ornitoloxica d’Asturies, SOS Cuideiru, Asociación Asturiana de Amigos de la Naturaleza, Ecoloxistes n’Aición Asturies, Greenpeace, Ecos Astures, Ereba Ecología y Patrimonio, Mundo Vivo, Asociación Geotrupes, Teachers for Future, Asociación Biodevas, Plataforma para la Defensa de la Cordillera Cantábrica, Rebelión Científica, Futuro Vegetal, Rebelión o Extinción y Grupu naturalista Mavea.
Alberto Rodríguez
This work is licensed under a Creative Commons Attribution 4.0 International License.
