Bonos díes, bona xente.

Alborecemos col cielu poco nuboso o escampláu na mayor parte d’Asturies, sicasí na fastera central ta cubiertu por nubosidá estratificada con unes temperatures que tan alrodiu de los 8ºC, rexistrándose nel puirtu Payares 0,7ºC.

Güei persistirán les nubes baxes o estratos na fastera central asturiana, tando más escampláu na cordelera con unes temperatures que camudarán poco, calteniéndose un ambiente afayaizu nes hores centrales del día pero dalgo fresco’l restu. L’aire sedrá sele ya variable con nordés dalgo molestu pela costa.

Mañana martes les nubes de retención, baxes o estratos van prodigase menos y el cielu va tar más escampláu en xeneral con unes temperautes que descenderán llixeramente y con vientu nordés molestu que baxarán entovía más la sensación térmica, sobre too na costa., solo ellí onde temos al abellegu d’él, la llume del sol del mediudía, calecerá l’ambiente y se tará afayaizu.

El miércoles situación mui asemeyada, sicasí tendremos dalguna nube más de retención na fastera central asturiana, amenorgando dalgo’l nordés y subiendo llixeramente les temperatures.

El xueves vamos seguir con altes presiones, vientu nordés pela costa y temperatures contenies al mediudía por mor del aire col cielu poco nuboso en xeneral y dalgún estrato na fastera central asturiana.

A partir del vienres les temperatures anicien un ascensu que se consolidará’l sábadu, pa volver a descender dalgo’l domingu. Nel cielu seguirá poco nuboso na mayor parte d’Asturies anque tendremos dalguna nube baxa na fastera central asturiana.

En resumen tendremos una Selmana Santa sin lluvies, fresca ya escasa nubosidá.

Semeya del nuesu collaciu Luis Alfredo del Macizo d’Ándara nos Picos d’Europa.