Nos primeros meses de 2023 perdióse más d’un asturianu a la hora por motivos vexetativos. Once ñacimientos y 42 muertes diaries dan les piores cifres dende que s’entamó a recoyer datos, con 1.756 residentes menos en dos meses
Demientres el pasáu mes de febreru ñacieron 318 asturianos, malpenes once al díe, siendo’l mes con menos nacencies d’una serie qu’entama cuntar nel 1990. Nel mes anterior foren 414 los nasciatos, sumando pente xineru y febreru un total de namás 732 rapacinos, frente a les 2.488 muertes na mesma fecha. Ello ye, que les muertes multiplicaron por tres, llargamente, los nacimientos, una relación demográfica incaltenible nun país no que lo que se precisa, con urxencia, ye lo contrario.
El saldu ye de 1.756 asturianos menos nesi periodu, perdiéndose alrodiu de 30 al día, más d’un por hora, un datu allarmante que de tan repetíu entama a dexar de causar impautu, pero que por ser sumáu a tolos anteriores datos negativos ye d’una gravedá tremenda: tamos quedando ensin asturianos.
La falta de condiciones pa crear una familia -precariedá llaboral absoluta, preciu de la vivienda, inestabilidá…- non solo tira perbaxu l’indiz de nacimientos, sinón que fuercia a miles d’asturianos a emigrar tolos años pa buscar fuera les posibilidaes qu’equí yos falten, polo que a esos 1.756 asturianos menos habría de sumase tolos que se vieron forciaos a dexar el país.
Susana Sela
This work is licensed under a Creative Commons Attribution 4.0 International License.
