La organización nacionaliega presentó a la Xunta Xeneral una propuesta de trabayu pa torgar futures foles d’incendios comu les que se tan viviendo esta primavera: que los conceyos incenciaos seyan declaraos llibres d’arboláu d’alta inflamabilidá, de mou que los ocalitos y los pinos seyan sostituyíos por arboláu autóctonu. La reforestación de los montes amburaos ye necesaria ya urxente, una situación qu’Andecha Astur ve comu una oportunidá de llibrase d’especies alóctones, qu’aparte de ser percombustibles son enforma dañibles pal suelu, pa les especies autóctones y pa la biodiversidá. Les replantaciones con árboláu autóctonu, aporfien, sedríen un apueste por rexenerar les viesques asturianes tradicionales, que, teniendo una bona xestión, son fonte de riqueza pa los conceyos que les esfruten

Nun ye la primer aniciativa pa protexer los nuesos montes que propón Andecha Astur; nos díes de la gran quema suxirió l’entamu d’una mesa téunica de negociación cola Guardería del Mediu Ñatural, Brigaes d’Investigación d’Incendios Forestales (BRIPAS) y Bomberos d’Asturies, na que definir un Reglamentu téunicu sobro la prevención y xixilancia de los incendios, disposición y emplegu de recursos materiales y homanos, intervención nos incendios ya investigación de los mesmos.

Propunxeron tamién una nuea Llei de Montes y Ordenación Forestal, ansí comu un nueu Plan Forestal p’Asturies, ellaboráu cola participación d’agricultores, ganaeros, organizaciones ecoloxistes, Guardería del Mediu Ñatural, BRIPAS…

Acusen a Adrián Barbón de tratar de sacar réditu elleutoral de les quemes, faciendo semeyes y declaraciones valeres “Les vecines y vecinos de Valdés, Tinéu, Allande, Piloña, Amieva, Balmonte, Cabrales, Cangues d’Onís, Grao, Llaviana, L.lena, Llanes, Morcín, Ribesella, Samartín… necesiten daqué más que visites presidenciales y palmaínes nel llombu. Necesiten, sobro too, financiación especial pa compensar los daños de los incendios y midíes práutiques pa qu’éstos nun se repitan” declaren.

Redaición InfoAsturies