Escontra una sentencia del xuez Lino Rubio Mayo que conderga sólo pol exerciciu de drechos sindicales básicos
Ayeri’l Comité de Sofitu a Les 6 de la Suiza entamó coles aiciones que tienen preparaes pa denunciar la sentencia que conderga a estes compañeres de forma inxusta y represiva. La campaña sofitu anició na Casa’l Chinu, llar de l’AAVV de Cimavilla, en Xixón, con una charra na que se desplicó con detalle l’orixe y el desenrollu’l conflictu que llevó a la increyible sentencia firmá pol xuez Lino Rubio Mayo, perconocíu pola forma en que sentencia escontra sindicalistes.
Na charra, que siguió bien de públicu, participó una de les compañeres condergaes y una representante del Comité de Sofitu. Dambes presentaron lo asocedío cola pastelería La Suiza, en Xixón, comu ún de los casos más graves de represión a muyeres sindicalistes por defender a una muyer trabayaora d’un “supuestu” delitu d’acosu sesual y d’otru “supuestu” delitu d’acosu llaboral.
Nel repasu los fechos quedaron clares tamién les rellaciones esistentes entre la drecha xixonesa, dalgún seutor empresarial más ranciu y les redes d’información policial, una telaraña escura onde s’amagostó’l procesu de persecución, detención illegal y posterior acusación de les acusaes. Señalóse especialmente lo que casos comu ésti suponen de revictimación d’una muyer y cómu’l 98% de les denuncies por acosu sesual acaben sobreseyíes, supuestamente por falta prebes, anque’n rialidá lo que pesa, sorrayen, ye la escandalosa falta d’interés que nestos casos amusen tanto policíes comu xueces.
Les 6 de La Suiza, condergaes a tres años y mediu de prisión y al pagu d’una multa de 150.000 € sólo son responsables de los tres fechos bien normales: pidir una xunta entre una trabayaora y l’empresariu de La Suiza pa tratar un conflictu llaboral, participar nesa xunta y participar en concentraciones pa denunciar públicamente’l casu. Estes aiciones, amparaes pola llexisllación vixente en materia de drechos sociales y sindicales, foron duramente reprimíes pol xuez Lino Rubio Mayo, anque la so sentencia ta agora recurría énte’l Tribunal Supremu español.
Pa comparar la dureza y el calter represivu d’esa sentencia podemos remembrar, por exemplu, otra del Tribunal Superior de Xusticia d’Asturies, cuandu en 2022, nel casu d’un pá condergáu por un delitu continuáu d’abusos sesuales sobro una fía, nun-y punxo pena cárcele y dexólu colar con tan sólo una multa de 4.500 €. Polo que se ve, la xusticia española quier castigar, más que ná, l’exerciciu de los drechos sindicales de les trabayaores.
Güei mesmo, vienres, 14 d’abril, a les 20’30 h., el Comité de Sofitu a Les 6 de La Suiza entama un pasucáis que va salir de la Casa’l Chinu, na Plaza La Soledá, en Cimavilla.
Prósimamente otros barrios de Xixón sedrán l’escenariu de nuees charres y pasucáis.
Toles actividaes de sofitu puen siguise na web https://6delasuiza.info/ y quien quiera contautar col Comité de Sofitu pue facelo escribiendo al corréu sofitu@delasuiza.info
Nel Dos Santos
This work is licensed under a Creative Commons Attribution 4.0 International License.
