Los fechos remóntense al mes de setiembre, cuando se detecta la rotura de l’arqueta La Torre, allugá tres de la fonte. Los vecinos de la redolada informron entós de la situación a los responsables de la Casa Conceyu, qu’inoraron l’avisu. Ante la falta d’actuacion de los responsables municipales, unvíen un primer escritu reclamando la reparación, con fecha de 28 de febreru, que tampocu foi efeutivu. El pasáu tres d’abril tornen dirixise per escrito a la corporación municipal, llendándose los mesmos a recolocar les piedres rotes de l’arqueta un pocu más curioses, ensin siquiera señalizar el problema, col consiguiente riesgu pa los coches que pasen perellí. En concretu, l’escritu denuncia la dexación de funciones por parte l’alcalde ya’l conceyal responsable ya que, pesi a tar alvertios va meses a día de güei l’arqueta siguen ensin iguar y la zona ensin llendase pa prevenir incidentes.
El fechu ye perasemeyáu al vivíu nel mesmu conceyu con otra arqueta estrozá que tuvo de prevocar un acidente anantes de que se decidieren iguala, tres meses y delles protestes vecinales dempués; la gravedá nesti casu yera que la mesma taba allugá na zona d’arruelu pa la reciella.
Los miembros de la Corporación Llocal tan suxetos a responsabilidá penal y civil polos actos y omisiones realizaos nel exerciciu del so cargu, ello ye, que son llegalmente responsables de los acidentes que se produzan por consecuencia del so desdexamientu.
Susana Sela
This work is licensed under a Creative Commons Attribution 4.0 International License.
