A menos d’un km d’au quieren poner los 2 crematorios viven 8.400 vecinos: 5.137 de Noreña y 3.313 de Siero, y una vegada más el Conceyu de Noreña escaeciérase d’avisa-yos de los impactos d’estes istalaciones industriales al par de so casa

El Conceyu Noreña aceutó a tramite dos solicitudes de fornos crematorios nel conceyu, un d’ellos pa cremación de calabres ya l’otru de residuos.Dalgunos de los gases que s’esprenden de los crematorios, talos como’l diósidu de nitróxenu (NON2), el monósidu de carbonu (CO), el diósidu d’azufre (SO2) y los hidrocarburos arumosos policíclicos, nun s’evalúen davezu nin se miden de forma continua, pero son bien peligrosos pa la salú.

Esisten medios técnicos p’amenorgar l’impactu d’incineradores como los crematorios, entamando por dotalos de doble peñera pa neutralizar los gases residuales que puedan xenerase. Sicasí, nestos dos proyectos nun se concreta si va esistir dalgún filtru pa esos gases residuales de los procesos nin cómo va ser dichu filtru. Los proyectos tampoco recueyen nengún estudiu meteorolóxicu y de dispersión de los contaminadores primarios xeneraos nel procesu, nin s’indiquen los valores de la calidá del aire actual na zona, datos fundamentales pa envalorar la idoneidad de la instalación y del so allugamientu.

Tampocu ta disponible el correspondiente informe de compatibilidá urbanística, preceptivu pa la continuación de los proyectos. “Entendemos que’l crematoriu nun ye una actividá compatible col plan parcial que desenvolvió esta parte del polígonu de Noreña, y ye una actividá que puede afectar negativamente a la industria alimentaria” declaren dende la Coordinadora, que tamién recalca que los fornos crematorios son actividaes contaminadores de l’atmósfera, polo qu’allugar dos d’ellos al par de los vecinos nun tien xacíu,  “De fechu, un d’esos fornos ya fore retiráu de la Pola Siero por illegal”. 

Alberto Rodríguez

This work is licensed under a Creative Commons Attribution 4.0 International License.