Bonos díes, bona xente.

Esti llunes vamos tener el cielu poco nuboso o escampláu, sicasí pue surdir dalgo de nubosidá de retención na cara norte de los cordales asturianos. L’aire sedrá del nordés molestu pela costa, faciendo que les temperatures másimes nun medren muncho pela fastera llitoral ya central, tando más altes nel interior asturianu. La nueche sedrá más bien fría.

Mañana martes vamos tener un día mui asemeyáu anque les nubes de retención puen ser más abondoses y les temperatures, tantu másimes como mínimes, más baxes. L’aire del nordés seguirá siendo molestu pela costa y solo vamos tar afayaizos onde temos al abellugu d’él.

El miércoles l’aire nordés nun sedrá tan marcáu y les temperatures ascenderán moderadamente, sobre too nel interior y cordelera,. N’alborada surdirán borrinos y nublines no fonderu los valles.

El xueves ye probable que tengamos dalguna nube más, sobre too na fastera central, siendo d’escasu desendolque y en forma d’estratos, tando más escampláu na cordelera y valles averaos con unes temperatures que camudarán poco o descenderán llixeramente les másimes na metá norte. L’aire sedrá sele ya variable con brises del norte pela costa.

El vienres paez que pue estropiase dalgo y el timepu sedrá más inestable con intervalos nubosos y posibilidá de dalguna precipitación feble ya dispersa con unes temperatures que nun rexistrarán grandes cambios, calteniéndose un ambiente suave en xeneral.

El sábadu seguiremos con intervalos nubosos y poques posibilidaes de lluvia pero si con un descensu nes temperatures, n’esti casi sedrá más bultable nel interior y cordelera. Y pa finar el domingu predominarán los claros sobre les nubes con un ambiente mui afayaizu.

Que paséis un bon llunes collacies ya collacios.

Desgraciadamente sigue ensin vese precipitaciones abondoses a ningún plazu, semeya coyida pela rede.