El Principáu aprebó la tramitación ambiental de los parques eólicos Folgueiras y Chao Gran, promovidos por Enel Green Power; Viento de Sellía y Viento de Castelo, promovios pol grupu Alfanar, y Carrugueiro 1 y 2, d’Electra Norte
De pocu sirvieron les protestes y manifestaciones de los vecinos de la zona, qu’aportunen en que la compatibilidá d’estes instalaciones y el mundu rural -especialmente la ganadería- ye imposible, nin la propuesta de moratoria eólica llanzada por Andecha Ástur: el Principáu sigue, implacable, el so calendariu d’avance na instalación de aeroxeneraores n’Asturies, implicando con fuercia a los conceyos más occidentales. En concretu los planes afecten a los conceyos de Taramundi, A Veiga, Castropol, Vilanova d’Ozcos, Boal y El Franco -recordemos que dalgún, como Taramundi, cuenta yá con centenares d’estes torres, d’alredor de 200 metros d’altor-. Parello fueron necesarios dellos “trucos”, como estazar en varios los parques demasiáu grandes para ser xestionaos pola autoridá asturiana o apurar los trámites, énte la fecha llende del 25 d’abril.
Asina, aprobáronse güei, a cinco díes de la fecha máxima axustada, les autorizaciones alministratives previes de cinco nuevos parques eólicos nel estremu noroccidental asturianu, que suman en total 22 nuevos molinos y van tener una potencia instalada conxunta d’alredor de 98 megavatios.
El desendolcu de los parques eólicos n’Asturies tuvo estrau d’irregularidaes dende l’entamu, delles ensin resolver, comu la falta d’Evaluación Ambiental Estratéxica de los efeutos de los planes nel mediu ambiente. Siguen ensin resolver les abondes denuncies, mayoritariamente presentaes pola Coordinadora Ecoloxista, polos daños ambientales, urbanísticos y al padremuñu hestóricu.
Nel Dos Santos
This work is licensed under a Creative Commons Attribution 4.0 International License.
