“Regalos envelenaos”, el llegáu d’Ana González pa Xixón

21 Abril, 2023

Andecha Astur acusa a l’alcaldesa de Xixón de despidise dexando tres de si entamaos dellos proyeutos dañibles pa la ciudá

“La ciudá necesita con urxencia un cambéu rial haza una política bramente socialista, democráticamente participativa y sofitá nos intereses de la ciudadanía, non nos de lobbys de presión de tou tipu“

Una planta de pirólisis refugada pola opinión pública, un Plan de Movilidá Caltenible que’l propiu candidatu del so mesmu partíu refuga y promete modificar y un Reglamentu de llaicidá que, siendo necesariu, nun pasa de ser una mera y erma declaración d’intenciones. Esos son, acordies Andecha Astur, los principales “regalos envelenaos” que dexa tres de si Ana González anantes d’abandonar la Casa Conceyu Xixón.

No que cinca al primeru, l’alcaldesa cesante de Xixón declaróse partidaria de llantar n’El Muselón l’anunciada y perpelligrosa planta de pirólisis, siempres que cumpla la llexisllación vixente; esta esclariación, resalten dende A.A, nun ye del too improcedente, “porque nun ye la primer vegá que’l PSOE defende n’Asturies istalaciones illegales”.

Otru de los planes polémicos que dexa tres de sí Ana González, nesta ocasión col sofitu d’Izquierda Unida, ye’l Plan de Movilidá Caltenible 2021-2030, aprebáu yá pela Xunta Gobiernu municipal colos votos a favor del PSOE, mentantu Floro, el nueu candidatu a alcalde del PSOE declara tar escontra’l so conteníu. Fechu a escondies de la participación popular y valeru pa solucionar los problemes de movilidá en Xixón, el Plan de Movilidá Caltenible “ye otra importante pieza averiá que la ciudadanía refuga mayoritariamente”.

Comu tercer plan fallíu, el Reglamentu de Llaicidá, “una idega que vien siendo necesaria dende qu’entamó haber ayuntamientos supuestamente democráticos, pero a la que siempres se ñegó, fasta agora, la esquierda española. El Reglamentu que mos dexa’l PSOE d’Ana González nun ye más qu’una mera declaración d’intenciones. Asina, posibilita que la Casa Conceyu publicite actos relixosos cuandu éstos tengan “interés” turísticu o cultural, un coladeru que permitirá publicitar non sólo la Selmana Santa, sinón tamién cualisquier otra cellebración relixosa. El testu tamién permite que los conceyales participen n’actos relixosos”.

Finalmente dende la formación nacionaliega apelliden de “más de lo mesmo” al programa qu’anuncia’l PSOE de Floro pa los prósimos cuatru años de xestión municipal. “La ciudá necesita con urxencia un cambéu rial haza una política bramente socialista, democráticamente participativa y sofitá nos intereses de la ciudadanía, non nos de lobbys de presión de tou tipu” declaren.

Nel Dos Santos