La l.luarquina Ana Tables Styling algama’I concursu de cachopos #Cachopomía cola so propuesta de cachopu con morciella matachana y cebolla caramelizada.

Nel eventu se presentóse, n’esclusiva, el spot del 7º principiu de la Xixonomía: “L’agua ye’l principiu de too, ¿o non?”, que pon en valor la cultura sidrera

El I Concursu de Cachopos #Cachopomía, enmarcáu na campaña de promoción turística Xixonomía, yá tien ganadora. La l.luarquina y residente n’Avilés, Ana Isabel Fuertes, @ana_tables_styling, algamó’l gallardón na prueba que se celebró ayeri nueche en Madrid y na que compitieron los 4 finalistes esbillaos ente los más de 70 creadores de conteníu ya influencers que participaron nel concursu. Los y les participantes teníen de realizar la so receta de cachopu con carne de la IXP Ternera Asturiana y quesu especial pa cachopos de Central Llechera Asturiana.

La final del concursu, entamáu por Visita Xixón cola collaboración de Central Llechera Asturiana, celebróse nun eventu nel qu’aconceyaron más de 60 creadores de conteníu del mundu los viaxes y la gastronomía y que sirvió pa presentar n’esclusiva tamién el principiu nuevu de la Xixonomía, el 7º: “L’agua ye’l principiu de too, ¿o non?”. Nel eventu tamién participó Sidra Trabanco, qu’afitó un requexu onde los asistentes podíen prebar unos culinos de sidre.

La ganadora, que presentó un cachopu con morciella matachana y cebolla caramelizada, algamó’l troféu tres una batalla dura colos otros tres finalistes na que tuvieron de cocinar el so cachopu en direutu en menos de 30 minutos. El premiu consiste nun viaxe a Xixón, una visita a la Cueva’l Molín, onde se madura’l quesu Cabrales de Central Llechera Asturiana, y una mochila de viaxe de 1 000€. Y tamién algamó’l pase direutu a la final del III Campeonato Amateur del Auténticu Cachopu Asturianu, entamáu por Central Llechera Asturiana cola collaboración de I.X.P. Ternera Asturiana. Los otros finalistes fueron Aprendizaje Viajero, Modo Traveller y 365 sábados viajando.

El xuráu profesional taba compuestu por Santos Tejón Llaneza, conceyal de Promoción Económica, Emplegu, Turismu y Comerciu de Xixón; Juan Povedano, Manuel Rodríguez Bueno y Teresa Coto, de Central Lechera Asturiana; Elena Cebada, de IXP ternera Asturiana; Yolanda Trabanco, de Sidra Trabanco; y Emilio Rubio, en representación d’Otea. A esti xuráu profesional xunióse un xuráu popular compuestu por cuatro de los asistentes al actu, que fueron esbillaos por sortéu.

7º principiu de la Xixonomía, cola sidra como protagonista

L’eventu sirvió pa presentar, n’esclusiva, la nueva historia del Tratáu de Xixonomía que Visita Xixón ta ellaborando pa la promoción turística de la ciudá. Nesti casu, la historia correspuende al 7º principiu de la Xixonomía. “L’agua ye’l principiu de too, ¿o non?”.

Alberto Rodríguez

This work is licensed under a Creative Commons Attribution 4.0 International License.