Ca vuelta son más les empreses y profesionales que deciden emplegar l’asturianu comu llingua na que desendolcar el so llabor. Dende InfoAsturies queremos facer rellumar el so compromisu dedicándoyos un espaciu selmanal nel nuesu diariu; remembra-y, siempres, en toles estayes: Consumi Asturiano

Díes adulces ye un proyectu profesional de fotografía qu’enfótase’ndellos momentos perespeciales de la vida una ma: maternidá, llactancia y embaranzu. Nes sos semeyes hai un mirar natural y cenciellu onde s’espeya la complicidá y espontaneidá que ñaz ente una madre y les sos fiyes y fiyos

Entamamos presentando un proyeutu cientráu nos primeros díes de vida, los tiempos na que la llingua de la vida ye la materna y les pallabres que sentimos van ser les que mos marquen.

Díes Adulces ufierta un espaciu seguru y afayaízu pa que les mas puedan amosar la guapura d’esti viaxe que ye la maternidá. Les sos semeyes son una oportunidá de compartir esta experiencia y festexar hestories úniques.

El proyeutu ta impulsáu por Leti Cernuda, fotógrafa asitiada en Piloña, que percorre tolos requexos d’Asturies pa facer los sos reportaxes. La so maternidá foi la que fizo que se realcontrara cola cámara, p’alcontrar formes creatives de documentar y guardar el rápidu pasu’l tiempu. Les sos semeyes tienen un calter únicu y atemporal y son quien a capturar les emociones.

Díes Adulces ye una fotografía fecha en casa y pa la xente de casa, na llingua propia y que fai un apueste pol formatu físicu, capaz de caltener les alcordances irrepetibles d’un mou duraderu. 

Asina queden presentes pa siempre los díes de vivir adulces, los díes enllenos d’instantes curtios; los de los pequeños momentos tan intensos que s’estemecen col añar de la maternidá.

“Contemplar una y tantes vegaes los momentos captaos, revivir una y tantes veces esos díes únicos. Esa ye la nuestra fuercia y el nuestru deseyu”. 

Pa informate y conocer Díes Adulces pues siguir les sos redes sociales @diesadulces o contactar pel corréu info@diesadulces.com.

Susana Sela

This work is licensed under a Creative Commons Attribution 4.0 International License.