Al no cuayar la so propuesta de creación d’un Frente Ampliu ente organizaciones asturianes, Andecha Astur presenta candidatura a Asturies, Xixón y Uviéu siendo la única formación que permite’l votu n’asturianu y que nun cientra’l futuru d’Asturies en Madrid. “Sintimos que mos obliga a ello’l nuesu compromisu con esta tierra, la nuesa trayeutoria na defensa de los asturianos comu clas y comu pueblu”. 

Tres dellos meses enfotándose na formación n’Asturies d’un frente ampliu común nel qu’axuntar a organizaciones te d’ámbetu asturianu y d’esquierdes, ensin ser quien a ello, Andecha Astur opta por presentase’n solitario a les elleiciones, llevando comu cabeza de llista a Diego Morís y Llucía Fernández pola circuscrición central, mentantu Ánxel Pardo y Ana Isabel Ríos abren la llista del ocidente, y Xabel de Cea y Mª Teresa Velasco la del oriente.

Asina mesmo, Andecha Astur presenta candidatura nes elleiciones a la Casa Conceyu d’Uviéu y a la de Xixón. Miguel Ánxelu Agudo y Dulce Gil encabecen la llista de la capital, mentantu que la de Xixón ábrenla Alexander Martínez y Carme Pérez.

Na so llinia, Andecha Astur anunciaron el so apueste pola participación popular y la creación de polítiques creaes por y pa los asturianos, afayaes a les sos necesidaes reales ya ensin inxerencies dende Madrid “Porque les asturianes y asturianos persabemos, sin que naide mos lo organice dende fora, qué necesitamos y qué queremos pa los nuesos pueblos, ciudaes, montes, mar, escueles, hospitales, residencies xeriátriques, emplegos, sofitos sociales, llingua, artesanía, produciones culturales, esportes, carreteres, trenes, industries, enerxía, ociu… Porque ná sirvirá meyor a los nuesos intereses comu comunidá qu’aquelles iniciatives y regulaciones qu’escoyamos n’Asturies” declaró Diego Morís (“Roxu”) tres de la presentación de la candidatura.

Nel Dos Santos

This work is licensed under a Creative Commons Attribution 4.0 International License.