Llama l’atención la perda d’emplegu públicu, con 9.500 puestos menos nun añu, la cayía de la población activo y l’alta temporalidá de los emplegos, que sigue sumando un 42’1 % de los contratos
Los datos apurrios pola EPA del caberu trimestre son moderadamente positivos, con una perruina creación d’emplegu, -creación al fin y al cabu- y una baxada del paru coincidente cola perda de población activa. Los escasamente 500 puestos de trabayu creaos nesti trimestre son na so mayoría d’emplegu a tiempu parcial.
Sicasí, un analís de los datos en términos interañales dexa datos bien esmoleceores. Entantu a nivel estatal baxa’l paru, Asturies tien 4.800 paraos más y 5.300 emplegaos menos que va un añu. L’emplegu públicu ye’l más fuertemente afeutáu, con 9.500 puestos de trabayu menos que’n marzu del 2.022, 3.100 d’ellos nesti caberu trimestre. La temporalidá de los trabayos ye un 11% superior a la media l’Estáu, con un 42’1% que torga la estabilidá llaboral ya imposibilita la creación d’un proyeutu de vida a la mocedá.
Asturies continúa teniendo la tasa de población activo más baxo del estáu, con un 49’71% de la población trabayando o buscando trabayu, un paru de 26’64% pente la mocedá y cuasi un 50% de paru de llarga duración, con perdificil reincorporación al mercáu llaboral. Una de ca diez families asturianes ta en situación mui vulnerable, dos puntos pior que la media estatal.
Alberto Rodríguez
This work is licensed under a Creative Commons Attribution 4.0 International License.
