La Sala Albeniz acoyerá mañana el conciertu que presllará un mes d’actividaes d’Asturies Insumisa cola actuación de La Tarrancha, Ochobre y Escuela de Odio
Asturies Insumisa entamó’l so camín a entamos d’esti mes, con una riestra d’actividaes, charres y alderiques que se repartieron pela xeografía asturiana recoyendo los temes d’actualidá que más esmolecen al pueblu asturianu, faciendo un fondu analís de la situación y dando cabida a movimientos sociales, llaborales, culturales y ciudadanos de tol país.
Sicasí, esti Abril Insumisu nun foi sinón l’antesala cola que se pretendía dar a conocer esti movimientu, que se presenta oficialmente mañana sábadu 29, nuna completa xornada con arruelu, esportes, cultura, alderique y música qu’entamará a les once y media la mañana con un taller de valtu na Casa’l Chino, en Cimavilla (Xixón) pa siguir a la una col alderique “Por una nueva fola de disidencia n’Asturies” na que se repasarán les conclusiones de tolos alderiques fechos a lo llargo’l mes. Depués de la posa pa xintar, a les 4, cellebraráse un taller d’hestoria del ská y por fin a les cincu la esperada presentación d’Asturies Insumisa, na que se va dar a conocer quien son y cual ye’l so enfotu.
A les siete entama na sala Albeniz el conciertu colos grupos Ochobre, La Tarrancha y Escuela de Odio, presllando esti Abril Insumisu y dando pasu a un mayu qu’entama fuerte, cola anunciada participación del bloque d’Asturies Insumisa nel manifestamientu que percorrerá les cais de Xixón na mañana del llunes.
Nel Dos Santos
This work is licensed under a Creative Commons Attribution 4.0 International License.
