Bonos díes, bona xente.
Alborecemos col cielu mui nuboso y dalguna gotera con unes temperatures que tan alrodiu de los 12ºC, rexistrándose nel puirtu Payares 3,9ºC.
Güei llunes l’aire de componente norte mos apurrirá nubosidá abondosa que vendrá acompangada de precipitaciones febles en xeneral, amás les temperatures van tar en descensu y la nieve surdirá nes cumues asturianes perriba de los 2000m.
Mañana martes l’aire predominante sedrá del nordés con raches moderaes en zones del llitoral que fadrán baxar abondu la sensación térmica, nel cielu tendremos intervalos nubosos, sobre too na fastera central asturiana y na cara norte de los cordales mostañosos con precipitaciones febles ya intermitentes. Les temperatures siguen en descensu y la nieve va tar ente los 1500-1800m.
El miércoles seguiremos con muncho nordés pero con menos nubes que surdirán na contorna de los cordales y na fastera central, predominando los grandes claros nel restu. La sensación térmica sedrá siendo mui baxa, ellí onde nun temos abellugaos del vientu nordés que va seguir soplando cafiante na costa y llitoral asturianu.
El xueves nun dará tregua’l vientu nordés ya tendremos un tiempu mui asemeyáu con nubosidá de retención emburriada pol vientu nordés pero con predominiu de los grandes claros na mayor parte d’Asturies ya con escases posibilidaes de precipitaciones que solo se podrán dar en puntos mui determinaos.
El vienres paez qu’afloxa dalgo l’aire, sobre too nel interior onde sedrá sele en xeneral y nel cielu tendremos nubes ya claros con unes temperatures que tienden a subir dalgo.
El sábadu y domingu tendremos dalgo más de nubosidá y la posibilidá de precipitaciones va a estendese a más zones d’Asturies, pudiendo desendolcase les nubes na contorna de la cordelera y dexanos dalgún xarabatu feble ya dispersu col aire que sedrá sele pero picará más de norte con unes temperatures que camudarán poco, calteniéndose un ambiente fresco pa la época na que mos atopamos.
Que paséis un bon llunes collacies ya collacios.
Semeya que mos l’apurre’l nuesu collaciu Pachu Armesto Hevia.
This work is licensed under a Creative Commons Attribution 4.0 International License.
