Andecha Astur torna a conseguir validar l’usu de papeletes llegales n’asturianu, pesi a les munches trabes puestes poles Xuntes Elleutorales pa ello. Sicasí, alvierten a los votantes de que la represión condiciona entá l’exerciciu del drechu al votu, ya que aunque les almite y son válides, l’Alministración nun facilita papeletes n’asturianu, sinón que ye ca partíu’l que tien de pidir la so validación y pagar la so impresión. Les papeletes n’asturianu nun puen tar presentes nes meses y cabines de los colexos elleutorales sinón que ca votante tien de trayer de casa la so papeleta n’asturianu, polo que dende Andecha Astur afalen a ponese’n contautu con ellos pa facer aportar a los votantes la correspondiente papeleta n’asturianu.

Seique la Xunta d’Asturise aprebó les papeletes, les Xuntes Elleutorales de Xixón y Uviéu, que tamién tienen la obligación de validar les correspondientes a los sos conceyos, tán retrasando tolo posible la so rempuesta, apurando a costafecha los plazos col envís de dificultar la impresión y repartu de papeletes.

Rescampla l’enfotu d’esti partíu, qu’algamó nel añu 2000 la sentencia del Tribunal Costitucional que permite a los partios presentar les candidatures n’asturianu, drechu qu’el restu de partios -con base’n Madrid- disprecia. “Andecha Astur demuestra cola so práutica, llarga y pública, que nunca nun dobla na defensa los drechos colleutivos que comu pueblu o comu clas correspuenden a les asturianes y asturianos, poniendo nos drechos llingüísticos el mesmu puxu, seriedá ya honradez colos qu’Andecha Astur defende los drechos sociales, llaborales, económicos, d’identidá sesual, medioambientales… de toes” declararon dende la formación nacionaliega.