El 40% de la inversión pública en sanidá va parar a manes privaes
L’Asociación de Trabayaores Asturianos de la Sanidá (ATAS) convoca pa esti sábadu 20 de mayo un manifestamientu pola Sanidá Pública que saldrá de la Estación de Renfe a les doce del mediu díe.
Nella reclamen tanto la meyora de la calidá de servicios comu de les condiciones llaborales de quienes trabayen nellos, daqué mui lligáo pente si y sobre tou a les polítiques neolliberales de retayos d’inversión que prioricen criterios económicos mui per delantre de los sanitarios y que van dexando’l campu abiertu a la sanidá privada pol sistema de desaniciar virtualmente la pública.
Amás de les precaries condiciones del personal contratáu direutamente pol SESPA, con condiciones mui inferiores a les d’otros territorios del Estáu -lo que desplica sobradamente la fuga de mélicos y enfermeros-, destaca la llaceriosa situación de los trabayaores de socontrates. Dende l’aprebación de la llei 15/97 les empreses privaes van copando pali que pali los servicios venceyaos a la sanidá que tendríen de xestionase publicamente: llimpieza, llencería, cocina, seguranza, llaboratorios… apiorando progresivamente les condiciones de trabayu de les persones que realicen estos servicios y por supuestu, la calidá de los mesmos. Al tiempu, cuatro de ca diez euros del presupuestu sanitariu van parar a manes privaes.
Nesti tema, remembren los convocantes, tamos toos implicaos, non solo los trabayaores, polo qu’afalen a tola población a manifestase esti sábadu con ellos.
Alberto Rodríguez
This work is licensed under a Creative Commons Attribution 4.0 International License.
