Concentración contra la pirólisis a la puerte l’alderique pente candidatos a l’alcaldía

17 Mayu, 2023

D’entrar en furrulamientu, la planta de PRECO trataría 45 vegaes más de basories que les que se producen en toa Asturies, l’equivalente de 100 botelles de plásticu al día por xixonés
“Podría anubrise un km cuadráu al añu con bales de plásticu de 1’45 metros d’altor”

Ayeri tuvo llugar nel Teatru Xovellanos el primer alderique ellectoral abiertu al públicu ente dalgunos de los candidatos qu’alleguen a l’alcaldía nes elecciones del 28 de mayu. Dientro del Teatru actuaben Luis Manuel Flórez, “Floro” (PSOE), José Carlos Fernández Sarasola (Ciudadanos), Carmen Moriyón (Foru), Olaya Suárez (Podemos), Ángela Pumariega (Partíu Popular), Sara Álvarez Rouco (Vox), Javier Suárez Llana (Izquierda Xunida) y Rufino Fernández (Equo). Otros candidatos, non convidaos a alderique, como Alexander Martínez Fernández (Andecha Ástur) quedábense fora, manifestándose al pie colos más de doscientos ciudadanos qu’allegaron a la concentración en contra de la instalación de la planta de pirólisis nel puertu d’El Musel.

Los concentraos, a pesar de ser bien coscientes de la gravedá de la tema, encararon la concentración con humor. Asina nos altavoces les vaqueiraes revindicatives turnábense con declaraciones de vecinos alrodiu de la contaminación que carecen nos barrios del Oeste Xixonés y el cantar “Dame velenu”. La charanga Ventolín tomaba’l relevu ca pocu cola so música protesta y Pili Hevia, integrante de la charanga y de la Plataforma contra la Contaminación, vistida de maga, escenificaba “La Maxa de la Pirólisis” nuna enorme “maquinaria” mariella que tresformaba borrafes plástiques en fumu tóxico y mierdes de plásticu.

Nun foi precisamente por arte de maxa que PRECO, empresa que pretende istalar la planta, ye Barbón y el so Gobiernu, quien-yos abren les puertes, según denuncien los miembros de la Plataforma contra la Contaminación de Xixón y asina lo espubliza el mesmu IDEPA na so páxina

Recordemos que la planta de pirólisis que pretende istalase en Xixón tien la intención de comercializar 240.000 tonelaes añales de combustibles sólidos y 50.000 tonelaes d’aceite de pirólisis pa la industria químico o combustibles. Ello implica que la planta de PRECO va tratar 45 vegaes más de borrafes que les que se producen en toa Asturies, convirtiéndo Xixón, lliteralmente, nun vertideru.

Susana Sela