El Secretariu de l’Academia de la Llingua Asturiana, Xosé Ramón Iglesias Cueva, recibió a Diego Morís ‘Roxu` (candidatu a presidente del Gobiernu d’Asturies por Andecha Astur) y a Mariano Suárez (miembru de la Xunta Executiva d’Andecha Astur), espresándo-yos la so voluntá de defender los drechos llingüísticos de tolos asturianos nos procesos elleutorales

“El fechu de que la Xunta Elleutoral d’Asturies torgue tolos escritos n’asturianu, los desixa n’idioma oficial y llueu aceute un documentu’n catalán, previamente refugáu n’asturianu, ye un símbolu escandalosu de fasta ónde algama la represión llingüística n’Asturies y de cómu esti país necesita urxentemente una declaración d’oficialidá, con reconocencia de plenos drechos llingüísticos”.

Acordies la Sentencia 48/2000, de 24 de febreru de 2000, emitía por la Sala Segunda del Tribunal Costitucional, ta reconocíu’l drechu d’Andecha Astur, y dende entós el de tolos partíos, a presentar les candidatures n’asturianu, drechu que de magar entós namás ta exerciendo Andecha Astur.

Sicasí, ca comiciu representa una nueva brenga na qu’Andecha Astur tien de reclamar drechos ya alquirios, invirtiendo un tiempu y enfotu preciosos en plenu procesu elleutoral. Esti añu en concretu Andecha ta pasando per procesu especialmente llargu y abegosu pa consiguir la reconocencia del asturianu nos procesos elleutorales, alcontrando fechos represivos claros y teniendo que ganar a pulsu ca avance.

Poro, decidieron pedir amparu a l’ALLA, comu órganu cimeru en cuestión llingüística. Xosé Ramón Iglesias Cueva, Secretariu de la istitución, recibió a Diego Morís ‘Roxu` (candidatu a presidente del Gobiernu d’Asturies por Andecha Astur) y a Mariano Suárez (miembru de la Xunta Executiva d’Andecha Astur). Nel conceyu que caltuvieron apurrióse información y documentación al secretariu sobre les torgues que los nacionaliegos tan atopando pa consiguir la reconocencia del idioma d’Asturies nos procesos elleutorales, “Camín nel que tamos atopando fechos represivos claros y nel que tamién tamos llogrando avances sinificatibles que favorecen el respetu los drechos llingüísticos colleutivos”, en pallabres de Diego Morís.

Les Xuntes Elleutorales tán refugando sistemáticamente los escritos n’asturianu que-yos presenta Andecha Astur, faciendo cuasi imposible la necesaria y llegal comunicación cola Alministración elleutoral, dexando a esti partíu nuna situación de desigualdá d’oportunidaes manifiesta. Esta represión ta teniendo ya consecuencies concretes, comu la perda d’espacios públicos pa mítines, asinación de paneles pa propaganda, de cais pa encartelar faroles, d’espacios nos medios de comunicación públicos…

Tres un llargu alderique ambes partes coincidieron en que “El fechu de que la Xunta Elleutoral d’Asturies torgue tolos escritos n’asturianu, los desixa n’idioma oficial y llueu aceute un documentu’n catalán, previamente refugáu n’asturianu, ye un símbolu escandalosu de fasta ónde algama la represión llingüística n’Asturies y de cómu esti país necesita urxentemente una declaración d’oficialidá, con reconocencia de plenos drechos llingüísticos”.

Pel so lláu, l’ALLA tresmitió’l so compromisu de defender siempres a toles víctimes de la represión llingüística y de poner en marcha los sos mecanismos pa llogralo.

This work is licensed under a Creative Commons Attribution 4.0 International License.