De magar toles torgues coles que la formación asturiana ta teniendo qu’enfrentase pola so coherencia llingüística, son ya delles les asociaciones en defensa l’asturianu qu’amosaron el so sofitu.

“Ye inconcebible la falta de reación del restu de partios que se dicen fanun inconcebible actu d’insolidaridá nun tuvieron siquiera la decencia d’espublizar un comunicáu de sofitu a Andecha Astur”

Los primeros en reacionar ante la discriminación llingüística foron Iniciativa pol Asturianu, asociación bien conocía por  trabayar pola normalización del asturianu y pol reconocimientu de los drechos llingüísticos de los sos falantes,  qu’en cuantes que tuvo noticia de lo asocedío asoleyó -ya el 9 de mayu- una noticia na so páxina web y dellos mensaxes en redes sociales denunciando “esta llamentable y gravísima discriminación que se convierte amás nuna nueva prueba de la necesidá de cuntar cola midida constitucional que ye la oficialidá” remembrando qu’esta situación atenta contra la propia Llei d’Usu y Promoción del Asturianu.

Iniciativa pol Asturianu reclamó al Gobiernu d’Asturies un posicionamientu claru y valiente “Nun se pueden almitir situaciones como esta, na qu’una organización presente una documentación n’asturianu y el muérganu competente, la Xunta Electoral nesti casu, refugue siquiera considerala por únicamente tar escrita n’asturianu”.

En términos asemeyaos, pero más contundentes, declaró’l so enoxu l’Asociación Cultural de defensa de la llingua y cultura asturiana n’Ast, quien destacó la ridiculez de poder presentar documentación nel propiu país en catalán, gallego o euskera, pero non n’asturianu. Amás, dende n’Ast denunciaron l’actuación del restu de partíos que dicen defender l’asturianu y que non solo nun utilicen esi idioma nes sos relaciones cola alministración y colos sos votantes, sinón que “nun inconcebible actu d’insolidaridá nun tuvieron siquiera la decencia d’espublizar un comunicáu de sofitu a Andecha Astur, l’únicu partíu que da la cara mentes toos achanten. La Oficialidá llegará asina, non gracies a los artistes del posturéu y los falanbaldre”.

Remembremos que tamién l’Academia la Llingua Asturiana ufrió’l so sofitu a Andecha Astur, que declaró va pocu que toa esta situación ta afeutando mui negativamente al normal desendolcu de la campaña elleutoral y paralizando les sos actuaciones.

Nel Dos Santos

This work is licensed under a Creative Commons Attribution 4.0 International License.