Con esta insubordinación a la Xunta superior, les de conceyu ruempen con un cuartu sieglu de drechu al votu n’asturianu, ante’l silenciu compliz de los partios que se dicen defensores de los drechos llingüísticos

“Tamos denunciando un retrocesu de cuasi un cuartu sieglu nel exerciciu de drechos elleutorales y llingüísticos”.

Va 23 años qu’Andecha Astur valida pa les elleiciones les sos papeletes n’asturianu, yá seya d’ámbetu européu, estatal, asturianu o municipal, drechu deriváu d’una sentencia ganada pol partíu nel Tribunal Costitucional y que dengún otru partíu quiso aprofitar nesti cuasique cuartu sieglu.

Esti añu, siguiendo’l procedimientu avezáu, llevaron a valorar estes papeletes a les Xuntes Elleutorales, siendo validaes darréu pola d’Asturies, pero entardando dellos díes en recibir rempuesta de les d’Uviéu y Xixón, qu’a la fin decidieron enfrentase a la decisión de la xunta cientral y nun validar les papeletes.  Andecha Astur califica esta situación d’antidemocrática y represiva, alcontrando “escandalosa, prevocativa y antixurídica” esta disparidá de criteriu cola so Xunta superior, la d’Asturies.

Esta anormalidá democrática perxudica a un sólu partíu de tolos que se presenten n’Asturies, a Andecha Astur, porque son los únicos que caltienen la coherencia llingüística  utilizando esclusivamente l’asturianu. Como consecuencia d’ello son la única organización que nun pue dedicar toles sos enerxíes a facer una campaña elleutoral normal, teniendo que dedicar les sos fuercies y presupuestu a superar estes torgues alministratives malintencionaes.

“Esta anormalidá democrática dexa a Andecha Astur, y con ella a tol elleutoráu asturianu, nuna situación de grave indefensión, porque se tán vulnerando los drechos elleutorales y llingüísticos de les presones y les organizaciones” declararon na rueda de prensa entamada pa dar a conocer la situación, a la que tamién se convidó a participar a un representante de Les 6 de la Suiza, comu amuesa de que la llucha llingüística y la social van de la man nesta organización. 

Poro, Andecha Astur presenta recursu énte esta situación d’anormalidá democrática, pa defender la continuidá del drechu al votu n’asturianu.

Redaición InfoAsturies

This work is licensed under a Creative Commons Attribution 4.0 International License.