El mes d’Abril Asturies Insumisa acomuñó nun mes de charres y alderiques a munchos protagonistes de l’actualidá social y llaboral d’Asturies. Dende InfoAsturies queremos dir presentándovoslos y tresmitiéndovos los sos mensaxes pa una Asturies con un meyor futuru

Cristina Martínez García ye delegada sindical de Konecta Avilés, grupu de teleoperaores que col so enfotu y la so xunidá consiguieron meyorar les condiciones llaborales de la so empresa. El so mensaxe ye una llamada a la xunidá pente trabayaores de tolos sectores “si tamos xunios, cambiar les coses ye posible”

Aportaste a Asturies Insumisa comu miembru de la Plataforma de trabayaores del Grupu Konecta. Cuentamos un pocu cual ye la vuesa llucha

En telemarketing tenemos munchisimos conflictos. Nin siquiera teníemos tiempu pa dir al bañu, nun se mos permitía; echábenmos por baxa productividá, 20 persones a la semana… y toi falando en pasáu porque too eso llogremos cambialo, afortunadamente.

Non toles plataformes que trabayen en telemárqueting pueden tener esa suerte. Nosotres tenémoslo porque nos xunimos, porque somos un grupu que echó narices al tema y tuvimos la suerte de tener compañeres que nos apoyaron. Empezamos va cuatro años, al pocu d’entrar nueves nel comité, la mio compañera, Ana Bayón, y yo y yera too pegues col restu de comité que llevaba más de diez años como delegaes d’otres secciones sindicales. Pa que veas, una d’elles yera una seción sindical de la misma empresa, y ehi taba la presidenta, secretaria… yera la seción mayoritaria y siempre nos daben p’atrás, asina que aparte de les trabes de la empresa topábemos con trabes de compañeres.

Pero con muchu tesón, poniéndonos en contautu con otres plataformes del mesmu grupu empresarial, que se subdivide ca poco en distintes empreses y distintos nomes, dimos la vuelta al divide y vencerás. Nosotres, aunque la mio compañera trabaye pa otra compañía, si la mi compañera lo necesita yo voi tar ehí, aunque seyas d’otra seción sindical, a nosotres danos igual, tenemos qu’aidar a los compañeros. 

Entós con esa xunión vieron que yéremos fuertes y que nun cansábemos de pedir coses a la empresa, lo primero que consiguimos fue que los despidos que se ficieron nesi momentu que fueron 14, se declararen nulos; conseguimos que nos admitieren dientro’l nuesu trabayu poder parar pa dir al bañu, que paez increyible tener que pidir eso, nun ye humano, nun somos númberos, somos persones. Consiguimos que seyan emplegos más estables,  llamábamos aquello “el tren”, porque ca selmana entraba y salía una media de 20 persones, pero agora ya ta un pocu más estable. La xente qu’echaben yera por baxa productividá,  culpábente de la falta de ventes, pero si yo faigo cien llamaes al día, nun teo la culpa de nun topar clientes predispuestos, eso nun ye baxa productividá. Eso por suerte diéronse cuenta de que tábemos moviendo a la xente de qu’eso nun podía ser y fue cambiando.

Aún así, tenemos contratos d’entre 18 y 35 hores, cuasi denguna llega a les 40. Y digo cuasi denguna non por discriminar a los homes, sinón porque’l 97% de los teleoperadores güei día son muyeres.

Lo importante ye ayudase unes a otres, si daquién se pon malu, yo garro’l mio tiempu sindical y acompáñola a la mutua, o si una compañera protesta por algo y la manden dir a falar con un superior ¡teníen miéu! yo dígo-yos, nun te preocupes, voi yo, que pa eso toi. Eses pequeñes coses, si nun te apoyen los compañeros, por muncho que faigas…

Agora formais parte d’Asturies Insumisa ¿Con qu´enfotu entrais nesta plataforma?

Entramos n’Asturies Insumisa comu coleutivu pa tresmitir lo mesmo que vivimos nosotres, que la xente vea que se puede facer, la xunión fae la fuercia. A mi dame igual que trabayes na hostelería, que seyas rider, que seyas repartidor de cartes a domiciliu, una llimpiadora… nun queremos que la xente te sola, porque la xente ta viéndose sola frente a les empreses. Les empreses tan viniéndose arriba y tamos viendo que vamos camín de la esclavitú. La xente tien miéu y si nun ties quien te respalde… Dende una plataforma comu esta podemos dar puxu, ayuda a quien faiga falta.

This work is licensed under a Creative Commons Attribution 4.0 International License.