De magar güei y fasta’l 26 de mayu va tener llugar na Llaboral Ciudá de la Cultura (Xixón) la primer Amuesa d’Artes Escéniques, Escena en Rede, un proyectu enmarcáu n’Asturies, Cultura en Rede que ñaz cola cuenta de crear un llugar d’alcuentru profesional y comercial
La realización d’esta amuesa, y la so continuidá n’años vivientes, ye una demanda del sector de les Artes Escéniques asturianes dende va munchos años, que finalmente foi aprebada nos presupuestos d’Asturies del 2023.
L’Amuesa d’Artes Escéniques tien como principales oxetivos visibilizar a tolos axentes del sector (compañíes, ceadores, intérpretes, personal técnico, responsables de programación…) y xenerar un llugar d’alcuentru y d’intercambiu qu’evolucione en cada edición.
Destaca la gran cantidá d’espectáculos abiertos al públicu que van representase na primer edición, 16, atopándose ente ellos munchos proyectos de compañíes afiliaes a EscenAsturies y 18 compañíes y artistes presentarán los sos trabayos en sesiones de corta duración. Amás, xeneraránse otres actividaes alrodiu, comu los espacios d’ speed meetings, presentaciones de proyectos y acción formativa.
Participarán n’Escena en Rede les compañies Mar Rojo Teatro, Adrián Conde, Luz de Gas Teatro, Hipnótica Circo Teatro, ACAR Teatro del Mundo, Escena Vertiente, Teatro Plus, Guayominí Producciones, Carlos Alba Cellero, Teatro del Cuervo, El Callejón del Gato Producciones, Luz, Micro y Punto, Espectáculos Arlequina y La Líquida Teatro, Factoría Norte, Proyecto Piloto y La Sonrisa del Lagarto.
Dende EscenAsturies nun quieren dexar pasar per alto l’intre elleutoral nel que mos atopamos pa resaltar la emportancia de que los representantes de los partios autonómicos y llocales asistan a l’amuesa y conozan y sofiten lo que se ta faciendo n’Artes Escéniques n’Asturies. “Anguañu nun nos consten grandes planes políticos alrodiu la cultura nes propuestes elleutorales, quiciabes aprovechando l’Amuesa, seya un bon momentu por que los partíos se manifiesten” declararon dende EscenaAsturies.
Alberto Rodríguez
This work is licensed under a Creative Commons Attribution 4.0 International License.
