Anxel Pardo, candidatu d’Andecha Astur pa la zona d’Ocidente, tien 23 años, vive n’Oure, conceyu Valdés, y trabaya comu repartidor nel Occidente d’Asturies. Tien perclaro lo que quier pa la so fastera, una de les “esnales” escaecíes d’Asturies de les que los grandes partíos “alcuérdense namás cuandu hai elleiciones”

¿Qu’ufre Andecha Astur a los asturianos que nun ufren otros partíos?

Andecha Ástur ufierta una política cercana onde lo que nos estrema con al respective de otros partíos políticos ye que nós faemos polítiques dende Asturies y p’Asturies.
Ponemos a les Asturianes y Asturianos nel centru, ello ye, conocemos los problemes de la xente y tamos en política pa da-yos soluciones reales. Somos un partíu que queremos demostrar con fechos y non con palabres vacíes.
Otra diferencia ye que nós nun faemos política dende un sillón. Andecha Ástur fai una política de cai y ta conformáu por xente que la so única esmolición ye la xente y ameyorar la vida de les persones.

¿L’Ocidente tien una problemática estremá del restu d’Asturies?

Asina ye, l’Occidente d’Asturies ye de los más perxudicaos pola despoblación y les polítiques que se lleven a cabu nesta zona contribúin más a que los pueblos se vacíen.
Hai muy males comunicaciones col tresporte y muncho abandonu xeneral escontra esta zona.
Fálase de que’l tren de Xixón a Madrid pueda completase en trés hores y media; mientres, el trayectu más curtiu de Feve dende Xixón hasta la Caridá ye de trés hores y cincuenta y tres minutos, ente que’l más llargu ye de cinco hores y trenta y tres minutos.
Qu’el trayectu seya más curtiu pa dir a Madrid que pa dir a un pueblu de Asturies diz enforma de la política de Barbón y de la necesidá d’un cambéu escontra un partíu políticu que seya firme, diga basta y qu’entame a poner a la xente nel centru.
Tamién la masificación que se ta llevando a cabu de molinos eólicos nun lo ponen nada fácil…
Esta masificación amás de perxudicar la ganadería y a los vecinos ( munches d’estes instalaciones tán a menos de dos kilómetros de les cases) xenera más efectos negativos: l’alteración de los relieves de los montes, deforestación pa la istalación d’estos molinos, dañu a la biodiversidá… y por si fora poco dan lluz verde a construyir na reserva de la Biosfera del ríu Eo.
L’Ocidente ye un paraísu onde estes grandes empreses enllénense los bolsos ente que los grandes perxudicaos son la xente de la zona rural.

¿Crees que los partios fasta agora nel poder tienen en consideranza les necesidaes d’esa parte’l país?Non, nunca tuvieron la intención de solucionar los problemes. D’esta zona fálase namás cuando s’averen les elecciones.
N’elecciones prometen munches coses, pero a la de la verdá vuelven dar el llombu a la xente. Llexos de solucionar los problemes ponen más barreres que faen que cada vez sía más difícil poder vivir nesta zona.

Cítame los 5 principales problemes que carez esta fastera 

Emplegos temporales y dependencia ca vez mayor del sector turismu, males comunicaciones de tresporte, pocu caltenimientu de los nuesos montes y la masificación de molinos eólicos.

 ¿Andecha Astur tien un programa concretu qu’encare soluciones a estes cuestiones? 

Si, n’Andecha Ástur tenemos soluciones.
En cuestión de turismu nós apostamos por una llei de Turismu Caltenible, que faiga d’ésti una actividá respetuosa col mediu ambiente y la identidá asturiana.
Regular un impuestu del turismu caltenible, o ecotasa, que s’aplique nes estancies turístiques p’atender los gastos públicos que xenera l’actividá d’esti seutor y dedicar los fondos recaudaos cola ecotasa a recuperar, rehabilitar y revalorizar espacios emblemáticos d’especial valor ambiental, hestóricu o cultural, a financiar actividaes rellacionaes cola diversificación del modelu económicu, a proyeutos de recuperanza del paisax agrariu, a proyeutos de formación, I+D+I y a proyeutos de transición enerxético.
Nel ámbitu de les comunicaciones defendemos un Plan Compensatoriu Especial pa les comunicaciones nos conceyos de los estremos d’Asturies, nel marcu d’un Llei de Comunicación y Movilidá d’Asturies.
Ente que nos montes nós defendemos y apostamos por una llei de Propiedá y Xestión Caltenible de Montes y Biesques d’Asturies, regulando tamién iniciatives de formación específico; incluyendo la torna los montes comunales d’Asturies a les sos tradicionales comunidaes de propietarios vecinales, asina comu l’activación de polítiques forestales que nun hipotequen el seutor a la produción de celulosa.
Nel ambitu de los molinos eólicos defendemos una moratoria eólica: paralización del llevantamientu de parques eólicos en tol territoriu fasta la esistencia d’un Plan Enerxéticu Estratéxicu d’Asturies.

¿Qu’opines del turismu comu principal fonte d’ingresos pa les “esnales” d’Asturies?

La dependencia del turismu ensin nenguna otra alternativa solo favorez la despoblación de la xente xoven yá que ye un sector muy precariu ya inestable.
Créanse namás puestos de trabayu en temporaes altes, pero la xente tamién vive’l restu del añu…
La xente precisa un empléu fixu onde la so esmolición nun sía’l que va faer cuando acabe’l branu.
Estos trabayos concentrense principalmente nes zones costeres. L.luarca, Navia, Tapia… Zones costeres turístiques, polo que muncha xente precisa utilizar el coche para dir trabayar y ye un gastu añedíu, yá que como dixi, unu de los problemes del Occidente son les comunicaciones col tresporte públicu.
Tou esto xenera un cóctel que favorez a que la xente cole a buscar un futuru más estable fuera.

Si sales elexíu ¿Per onde entamaríes a trabayar?

si salgo escoyíu empezaría apurriendo les soluciones que la xente demanda faciendo una política cercana onde la pieza clave y fundamental seya la xente.
Faciendo polítiques pa frenar la sangria demográfico y convirtiendo Occidente nun llugar onde tantu la xente moza como la xente mayor tea tolo necesario pa poder vivir.
Un bon empiezu sería trabayar n’ameyorar les conexones de tresporte, les nueses carreteres y la creación d’emplegu.
Eso sedría lo principal. Convertir Occidente nun llugar pa la xente y nun pal gran oligopoliu eléctricu.

This work is licensed under a Creative Commons Attribution 4.0 International License.