Iniciativa pol Asturianu sollerta de nueves torgues a la ciudadanía a la hora de recoyer l’usu de la toponimia tradicional asturiana na renovación de documentos oficiales
Ye’l casu d’un home qu’acudió’l 30 de marzu a renovar el pasaporte a la Comisaría de Llangréu. Al entamar el procesu, solicitó l’usu de la toponimia tradicional del so conceyu, Llangréu, que ye oficial según el Decretu 73/2005, de 7 de xunetu, pol que se determinen los topónimos oficiales del conceyu de Llangréu.
Si bien la predisposición de los responsables del serviciu foi bona, el personal de la comisaría comunicó-y la imposibilidá d’incluyir la forma Llangréu nel documentu al nun apaecer el toponimu oficial nel llistáu de la base de datos policial. En cambéu, si foi posible rexistrar el topónimu ‘Riañu’. Instáu polos trabayadores del serviciu, el ciudadanu rexistró una reclamación. Na rempuesta, la Comisaría informa de la imposibilidá de modificar los campos del formulariu y comprométese a treslladar la reclamación a la División de Documentación pa tratar d’iguar el problema.
Iniciativa pol Asturianu sorraya qu’esta nun ye la primer vegada que se da esta situación asemeyada. Va nueve años, otru ciudadanu sufrió un casu asemeyáu na renovación del DNI, que tamién motivó una reclamación y posterior solicitú al Ministeriu del Interior pa da-y solución. Casi una década dempués la situación continúa ensin igua.
La organización quier treslladar el sofitu al afectáu y reclama al Ministeriu del Interior y a la Delegación de Gobiernu n’Asturies una actualización de les bases de datos pa que nun se repitan más casos de discriminación como esti.
Susana Sela
This work is licensed under a Creative Commons Attribution 4.0 International License.
