De magar la so creación en 2017, Cuatro Gotes ye un soplu d’aire fresco nel panorama cultural asturianu. Con delles llinies trabayu y un compromisu cola innovación, esta empresa fomenta la creatividá, allégase a les nueves expresiones y texe conexiones perinteresantes
Los sos proyeutos exemplifiquen la so güeyada polifacética: Xixón al día, una plataforma de noticies llocales, PlayPresta, pa xóvenes creadores, reconocía polos premios GAVA pola so innovación audiovisual, una web de noticies, espublizaciones dixitales, concursos, eventos, talleres, cursos… Tolo que seya cultura tien un espaciu en Cuatro Gotes.
Arriendes d’ello, Ver Asturies, la so plataforma bilingüe de turismu y ociu, cuenta con más de 50.000 seguidores en Facebook y la so llinia editorial espubliza anguañu el Premiu de Lliteratura Infantil y Xuvenil de la Conseyería y desendolca proyeutos como el poemariu de Diego Solís, “Volvemos en 6 minutos”, que incorpora un audiollibru y busca dir más allá na ufierta lliteraria.
Más enllá de los sos propios proyeutos, entamen grandes eventos pa terceros, collaborando con empreses y instituciones nel so desendolcu. Nesti sen, el ciclu Xixón Tours y programes audiovisuales como Mundu Sidreru, o el documental Elles: Muyeres na Lliteratura Asturiana, rellumen con lluz propia, nuna clara apuesta pola orixinalidá y diversidá.
La empresa lleva l’asturianu como imaxe de marca y arriendes de promocionar el nuesu patrimoniu cultural, funciona como una oficina de normalización llingüística, animando a les empreses a incluyir l’asturianu nes sos comunicaciones.
Susana Sela
This work is licensed under a Creative Commons Attribution 4.0 International License.
