Una bones que, gracies a la so implicación, Andecha Astur recuperó’l drechu al votu n’asturianu, la organización convida a toles organizaciones polítiques que se presenten n’Asturies a qu’ufierten a los sos votantes la posibilidá de votar n’asturianu.

El retardu nel reconocimientu del  drechu al votu n’asturianu torgó’l normal desendolque de la campaña elleutoral p’Andecha Astur, que, pente otros pilancos, nun pudo buzonear a tiempu

Depués de que les Xuntes Elleutorales de Xixón y Uviéu retaren a la cientral, retrocediendo 23 años nos drechos llingüísticos ya invalidando les papeletes n’asturianu, la Xunta Elleutoral d’Asturies vien de dar la razón a Andecha Astur, almitiendo los recursos nos que se denunciaben comu carentes de valor xurídicu les resoluciones de les Xuntes Elleutorales d’Uviéu y Xixón que prohibíen l’usu papeletes n’asturianu nes votaciones del 28 mayu.

Non solo eso, sinón que la Xunta Elleutoral d’Asturies comprometióse a notificar a toles Xuntes de Zona y a toles meses elleutorales del país el so determín de siguir garantizando l’usu l’idioma nes votaciones. 

La midía nun solo permite a Andecha Astur presentase n’asturianu, sinón a cualisquier partíu qu’asina lo deseye, siendo un bon indicaor de quien vraeramente defende los drechos llingüísticos y quien namás los remana con intereses políticos o personales. 

Sicasí, la formación nacionaliega denuncia que les condiciones algamaes, entá siendo una victoria, son llamentables: pesi a ser llegales, nun pueden tar nes meses, sinón que pa votar n’asturianu ye necesario trayer la papeleta de casa, polo qu’Andecha Astur tan repartiendo -con prieses pol retardu na resolución- les papeletes n’asturianu a los votantes, de manera que quien quiera votar n’asturianu tien de dirixise a los contautos recoyios na so páxina web pa recibir les correspondientes papeletes. 

La llucha polos drechos llingüísticos cobró estes elleiciones un fuerte tributu en perres, tiempu y enfotu a Andecha Astur, que nun pudo siguir la campaña elleutoral con normalidá n’igualdá de condiciones col restu partios, pero consideren que paga la pena porque “consiguir drechos democráticos tan básicos namás ye posible con un exerciciu continuáu de coherencia política, dende Andecha Astur reafirmámosmos nel compromisu con esti pueblu y na coherencia na práutica política, y lo mesmo que –por casu- llevemos allantre’l Casu Nicolasa, conseguimos paralizar el PGOU de Llanes, o llevar al xulgáu a los estafadores del ‘Muselón’, tamién conseguimos afitar los avances na tema llingüística”.

Aprofiten p’agradecer el sofitu y solidaridá de l’Academia de la Llingua Asturiana, d’Iniciativa pol Asturianu y de N’Ast en tol procesu de llucha xurídica pol drechu al votu n’asturianu.

Nel Dos Santos

This work is licensed under a Creative Commons Attribution 4.0 International License.