Alexander Martínez tien 29 años y siendo ñacíu en Xixón conoció bien ceo la emigración a la que se ve forciada la mocedá asturiana, trabayando 4 años per Castiella y tornando a Asturies más por convicción y amor al país que por cuestión de meyora llaboral. Axente comercial de profesión vien d’entamar la so andadura comu autónomu nel so propiu negociu

¿Qué pue ufrir Andecha Astur a esta ciudá qu’otros partios nun-y ufren?

Hai numeroses cuestiones q’Andecha pue ufrir, dignidá pa Xixón, meyores en servicios sociales, pero lo más importante según el mió puntu de vista ye la democracia participativa, queremos que la población de Xixón seya participe de les decisiones que se tomen nel ayuntamientu.

¿Qué retos tien per delantre esta ciudá?

Tien numerosos retos qu’afrontaremos, la llucha escontra la contaminación, la llucha escontra la privatización de los servicios públicos, la xeneración de empléu,  frenar la emigración de la mocedá, les ayudes a inmigrantes, la llucha escontra la violencia machista o la llucha escontra la discriminación de minoríes por cuestiones de xéneru, d’orientación sexual o raciales…

Toes estes cuestiones, ¿teneis pensao comu les enfocar  pa solucionales?

Por supuestu, nel nuesu programa elleutoral podeis topar propuestes concretes y detallaes pa caún d’estos temes, tantu a nivel de tol país comu a nivel de ciudá. Les soluciones esisten y nel fondu toos les conocemos, lo que fai falta ye enfotu pa poneles en prautica ensin dexase llevar por intereses d’otra triba.

La precariedá llaboral en Xixón ye xorreciente ¿Cómu puede atrayese emplegu de calidá a Xixón?

En primer llugar, pa traer empléu dignu creemos que ye una cuestión propia del ayuntamientu, hai que xenerar empléu municipal coles empreses que hai ya y les que hubiere que xenerar, como puén ser Guarderíes Municipales por exemplu. Per otru llau, también habría que facilitar a los y les autónomes más facilidaes pa prosperar.

La contaminación ye otru de los temes qu’esmolecen a los xixoneses, ¿teneis dalguna opinión al respeutu de la planta de pirolisis?

Por supuestu. Ye inadmisible. No que cinca a enerxies les propuestes siempre van ser modelos ecolóxicos y de futuru pa Xixón. Ye decir, el modelu de empresa pa la zona Oeste de Xixón tendrá que ser ún que respete a los vecinos, que nun dañe l’aire que respiren y que perdure nel tiempo, non un modelu dañible y anticuáu, como la planta pirolisis, que ye un modelu de fabricación de fae 150 años.

¿Cuál sedría’l to primer pasu en casu ser elexíu?

El primer pasu de Andecha Astur nel ayuntamientu sedría reunime con toles asociaciones de vecinos y negocios llocales analizando la situación de los sos barrios y proponiendo meyores xunto a ellos, faciendolos partícipes y non actuando de manera unilateral ensin consultayos.

This work is licensed under a Creative Commons Attribution 4.0 International License.