Miguel Ánxelu tien 50 años y pesi a ñacer en Xixón vivió pente Brixemada (Cangas), Carriona (Avilés) y Uviéu, onde vive cola so muyer -de la que ta fondamente arguyosu y a la que quier llanza-y un guiñu dende estes llinies-. Enfermeru de profesión, conoz los entresixos de la sanidá pública asturiana y depués d’un tiempu percorriendo tol Aria IV col SESPA  lleva años trabayando d’enfermeru del HUCA. Nel so programa pa Uvíeu úfrense vies de solución pa problemes estremaos, pero siempres, insiste, tomando’n cuenta los deseyos y necesidaes de la ciudadanía

¿Qué retos tien per delantre esta ciudá?

Esto daría pa un llibru. El dañu que-y fixo’l PP a la nuesa ciudá ye incalculable. Tolos servicios públicos privatizaos; el marafundiu y l’entetexíu alministrativu en manes d’amigos del PP, fixeron un enguedeyu descomanáu.

Por poner un exemplu bultable. La so impunidá nel poder durante años na Casa Conceyu llegó al estremu de facer factures oficiales de gastos públicos col conceutu de “Putas y varios”, ¡asina! ¡ensin cortase un pelu!.

Ente esto y el pautu’l duernu… el pueblu uvieín cayó nel conformismu. Nun son quien a ver qu’el cambéu ye posible. Máxime cuando na pasada llexislatura tuvimos un amagu de cambéu col tripartitu (Podemos, PSOE, IU), que se carauterizó pola pasividá absoluta del alcalde socialista cola complicidá d’IU (pa nun variar) y dalgún de Podemos qu’intentó facer coses pero nun pudo, yá sabemos como finaron toos ellos (a “puñalaes”).

A la final la xente da por fecho que n’Uviéu va tar el PP pase lo que pase, y la xente d’esquierdes que quier cambeos daveres nun vota.

Asina que pa min, lo principal ye que los uvieinos vuelvan a ilusionase cola política y que sepan qu’otru Uviéu ye posible.

Pero concretando un pocu ¿Cualos son los principales puntos de la vuesa campaña elleutoral pa Uviéu?

Comu te dicía, son munchos y abarquen cuestiones bien estremaes; buscamos soluciones efeutives pa los problemes del pueblu asturianu y pa ello hai qu’enfrentar temes comu’l de la vivienda, la sanidá, l’urbanismu… Cómu cuestiones especifiques d’Uviéu plantegamos pa entamar realizar consultes vecinales nos estremaos distritos, parroquies y pueblos del Conceyu sobre les actuaciones a rializar pola Casa Conceyu nellos. Son los sos habitantes quienes meyor saben lo que necesiten y lo que non.

Amás, oponémonos frontalmente a la Ronda Norte pel Naranco, apostamos por devolver SaMatéu al pueblu uvieín na so forma tradicional, ello ye, colos chiringuitos en manes de los movimientos asociativos y vecinales y non en manes de la patronal y vemos urxente una solución decidía popularmente pa la entrda a Uviéu, del tipu Imaxina un bulevar, que preserve Santuyano.

Como republicanos, queremos desvincular la Casa Conceyu de les actividaes que desendolque la Fundación Princesa na ciudá, nun cediendo recursos económicos nin materiales pa nenguna actividá publicitaria del réxime monárquicu.

No que cinca a edificios ya infracadarmes, tamos a la escontra de la especulación urbanístico de la Fábrica La Vega, patrimoniu industrial de tolos uvieinos y vemos qu’urxe la catalogación, rehabilitación y nueos usos públicos pal edificiu hestóricu de La Malatería de San Llázaru asina comu un plan de rexeneración y usos del Campu San Franciscu y mui especialmente, la reconversión de les infraestructures del Vieyu HUCA, creando un pernecesariu Hospital de Crónicos (anguaño les hospitalizaciones nel HUCA allónguense nel tiempu muncho más de lo debío, siendo ésti un Hospital d’agudos y non de crónicos) y rehabilitando’l restu d’instalaciones pa  dar soluciones habitacionales de renta baxa pa la mocedá y los más vulnerables.

N’otru orde de coses, vemos necesaria la inclusión de les Escueles 0-3 años del conceyu na rede educativa pública, convirtiéndoles nun sirviciu educativu, non asistencial y gratuitu, asina comu  l’apertura de colexos nel periodu vacacional, pa que sos pas y mas tengan aú dexalos cuando van a la xera. Nun puede ser que tola carga’l curiáu caiga nos güelos. Les alministraciones públiques tan pa dar sirvicios y soluciones.

Pa finar –seique habría más que decir- vemos importante poner en marcha un Plan de Reconocencia y Promoción de la Memoria Hestórica nel conceyu qu’incluya la conservación y señalización d’edificios y llugares, rutes turístiques, espublización de materiales divulgativos…

El tema de la vivienda, ¿Cómu lu enfocais?

Hai que tener un plan de vivienda público.

Por exemplu proponemos que parte de los edificios del vieyu HUCA, seyan destinaos a apartamentos de renta baxa pa la mocedá y persones vulnerables.T

opar los alquileres, los honorarios inmobiliarios correrán a cargu’l caseru y los propietarios de más de 5 inmuebles sedrán consideraos grandes tenedores, colo que pasarán a pagar munchos más impuestos.

Proponer soluciones normatives municipales pa llendar el númberu d’apartamentos turísticos n’Uviéu, qu’anguaño superen el millar de pisos, yá que l’alquiler mediu d’un pisu ronda los 500 € mensuales. La disminución d’estos apartamentos turísticos pondría nel mercáu d’alquiler más inmuebles, col abaratamientu de los mesmos.

Nun ye esautamente vivienda, pero tamién plantegamos midíes impositives a los grandes tenedores de baxos comerciales (rentistes na so mayoría) qu’impiden la criación y/o caltenimientu de negocios nellos, pola mor de los alquileres abusivos.

Uviéu nun ye namás una ciudá… ¿Contemplais actuaciones pa la fastera rural del conceyu?

Por supuestu, Uviéu ye un conceyu grande, con núcleos de población relativamente grandes como Trubia, qu’anda alrodiu los 2000 habitantes, y munchos pueblos. Nun ye too la Cai Uría.

Como siempres pensamos n’Andecha, hai que pregunta-yos “qué ye lo que necesiten”. Tamos fartos de ver cómo se camuden una y otra vegada aceres, asfaltáu, papeleres etc n’Uviéu ciudá, ensin ser necesario’l 90% les vegaes, y nun facer mantenimientu de pontes, víes y allumáu nes parroquies. Queremos menos “estética” pa la ciudá y más servicios pa los pueblos.

¿Cuál sedría’l to primer pasu en casu ser elexíu?

Eso téngolo claro. Dar voz al pueblu, que d’eso va la democracia, non de dictadures de 4 años. La soberanía reside nel pueblu, y como tal, ye’l pueblu quien tien que decidir no que-y afeuta.
Por descontao, garantizar al máximu los sirvicios públicos en favor de la clas trabayadora y los más vulnerables. Menos Premios Princesa y más guarderíes de 0 a 3 años gratuites.

This work is licensed under a Creative Commons Attribution 4.0 International License.