La placa ta allugá na fuesa común del Cimenteriu Municipal d’El Sucu, en Ciares, onde s’espardieren parte de les povises del que fore’l primer Secretariu Xeneral de la CSI ente los años 1981 y 1998
La Conceyalía de Participación Ciudadana del Conceyu Xixón, al traviés de Salomé Díaz Toral, comunicó nel díi d’ayeri a la familia del sindicalista la obligacion de retirar la placa, istalada dos años depués del fallecimientu de Luis Redondo, va diez años, ya qu’al paecer “vulnera la memoria hestórica, democrática y social”.
La mesma ta allugada al pie del monumentu a los fusilaos pola Dictadura Militar del Xeneralísimu Francu, onde acordies a los sos deseyos s’espardieren les povises de Redondo, comu señal de la so llucha conxunta.
Luis Redondo Alvarez recibiere la medalla de plata de la ciudá de Xixón en reconocimientu al so compromisu cola llucha de los trabayaores, collaborare a la creación de les Comisiones Obreres demientres el franquismu y más alantre foi fundador y secretariu xeneral de la CSI dende’l so entamu en 1981 hasta l’añu 1998.
Quiciás el so mensaxe “Col alma coleutiva salvámonos toos o con ella individual vamos toos al infiernu” ya nun ye compartíu col executivu xixonés.
Redaición InfoAsturies
This work is licensed under a Creative Commons Attribution 4.0 International License.
