“Decretazu tres decretazu, el Conseyu Européu, el Gobiernu d’España y el Gobiernu d’Asturies allóñense cada vez más de la defensa de los intereses de la mayoría social, desaposiando a la evaluación ambiental de conteníu real y a la sociedá de la so participación, esaniciando asina les garantíes ambientales de los proyectos d’enerxíes anovables”
Esti 4 de Xunu, Día Mundial del Mediu Ambiente, plataformes vecinales en defensa d’otru modelu enerxéticu y grupos ambientales asturianos acomuñen a les 11:30 h en La Sierra la Bobia pa cellebrar esi día sol llema “Anovables sí, pero non asina” pa faer visible’l so refugu común al actual modelu de transición enerxética: un modelu enerxéticu centralizáu y extractivista, que socializa los impactos nes zones naturales y rurales onde s’instala y llévase los beneficios a les grandes empreses del oligopoliu enerxéticu
Van entamar el día con una marcha y posterior llectura del manifiestu, tres de lo que van tener llugar delles actuaciones teatrales finando la xornada con un taller d’alternatives al modelu de transición enerxética actual.
Escoyeron como puntu d’aconceyamientu’l occidente asturianu como zona onde yá se sufren les consecuencies d’esti modelu y onde anguañu se ta sobro l’amenaza d’implantación masiva de cuasi 500 aeroxeneradores. Tou ello, ensin una planificación espacial que tenga en cuenta’l restu de valores y usos esistentes, ensin evaluación ambiental estratéxica, con deficientes evaluaciones d’impactu ambiental de los proyectos y ensin una participación pública real.
Reclamen que una transición enerxética que vaiga escontra fontes anovables ye necesaria, tantu p’amenorgar la contaminación (partícules, agua acedo, sustances tóxiques y canceríxenes) como p’amenorgar la nuesa dependencia de los combustibles fósiles que tán provocando la crisis climática y qu’amás ye un paradigma insostenible nuna realidá finita.
Dende estos grupos ambientales y plataformes vecinales asturianos faen un llamamientu a tola población por que se xunan a la celebración a les 11:30 na Sierra la Bobia y si hai borrina o llueve nel poliesportivu de Vilanova d’Ozcos.
Alberto Rodríguez
This work is licensed under a Creative Commons Attribution 4.0 International License.
