El Tribunal Superior de Xusticia d’Asturies avala la decisión de la Conseyería d’Educación d’Asturies y, poro, del Gobiernu d’Asturies de nun recoyer dengún conteníu de Llingua asturiana, en denguna les sos variantes, na primer etapa la educación, na que precisamente ye más emportante’l contautu cola llingua materna
“Esto demuestra la falta d’interés del Gobiernu d’Asturies nel avance de la normalización llingüística, tamién nes aules, faciendo rescamplar la hipocresía del PSOE cuando diz tar pola oficialidá” SUATEA
El Decretu 56/2022, de 5 d’agostu, dictáu pol gobiernu d’Adrián Barbón y pol que se regula la ordenación y s’afita’l currículu de la Educación Infantil n’Asturies, elimina la llingua llariega de la ensiñanzaneses edaes. Contra esi decretu presentaron dende SUATEA un recursu contenciosu alministrativu. pidiendo la nulidá del mesmu por vulneración del artículu 10 de la Lley 1/98, de 23 de marzu, d’usu y promoción del bable/asturianu, por nun recoyer nenguna referencia o mención que permita considerar la llingua asturiana como parte integrante del currículu nesta etapa, nin nes sos disposiciones nin nel so preámbulu.
Esti fechu nun lu niega en dengún momentu de la sentencia, colo que se reconoz lo que ye evidente: la inexistencia nel currículu d’Educación Infantil d’Asturies de denguna mención nin conteníu dalu de les nuestres llingües. Cuestión que contravién lo mandao pol mencionáu artículu 10 de la Lleid’Usu: “Nel exerciciu de les sos competencies el Principado garantizará la ensiñanza del bable/asturianu en tolos niveles y grados, respetando no obstante la voluntariedad del so aprendizaxe”, artículu que forma parte del Capítulu III – puntu 10 Enseñanza – Currículu. Poro, regula la Enseñanza y, dientro d’ella, específicamente’l currículu, ordenando que tien de recoyer la llingua asturiana en tolos niveles y graos.
Comu recalquen dende SUATEA, EI ye una etapa educativa, forma parte del Sistema Educativu xeneral y poro’l so currículu vese comprometíu polo dispuesto nesti artículu 10.
Alberto Rodríguez
This work is licensed under a Creative Commons Attribution 4.0 International License.
