Bonos díes, bona xente.
Alborecemos col cielu nuboso na fastera centru-oriental d’Asturies tando más escampláu na ocidental con unes temperatures que tan alrodiu de los 16ºC, rexistrándose nel puirtu Payares 10,8ºC.
Güei llunes la situación meteorolóxica sedrá mui asemeyada a los díes anteriores, una vegada que se dixebren les nubes del alborecer esfrutaremos del sol y a partir del mediudía dirán surdiento nubes de desendolque pa dexanos xarabatos de calter tormentosu pela tarde na metá sur d’Asturies, siendo poco probables nel restu con unes temperatures que camudarán poco, calteniéndose un ambiente chornosu.
Mañana martes pronósticu calcáu al de güei, sicasí les temperatures puen subir dalgo más.
El miércoles paez que veremos menos el sol, les nubes sedrán más abondoses y les temperatures másimes descenderán, a cambiu los xarabatos tormentosos nun se darán y solo tendremos la posibilidá de dalgo d’orpín mui llocal y feble.
El xueves y vienres volveremos a una situación de mañanes soleyeres y tardes tormentoses con unes temperatures másimes n’ascensu moderáu que mos dexarán un ambiente pegañosu y chornosu.
El sábadu entovía hai munches duldes pero podríamos seguir baxo la mesma situación con sol pela mañana y xarabatos de calter tormentosu durante la tarde y a partir del domingu remonten les altes presiones y s’estabiliza’l tiempu pero esto yá lu diremos viendo.
Que paséis un bon llunes collacies ya collacios.
Estos díes onde meyor tiempu tan teniendo ye na costa, amás paez que nun tan surdiento les nublines y borrinos pol contraste de temperatura.
Semeya de la sablera Xagó
This work is licensed under a Creative Commons Attribution 4.0 International License.
