Pente les Empreses y Profesionales pol Asturianu nun podía faltar Ediciones Trabe, una empresa privada que se dedica a la edición y comercialización de llibros, fundamentalmente, n’asturianu
Fundada nel 1992 col oxetivu de dignificar y visibilizar la lliteratura escrita n’asturianu, nos caberos años incorporó les otres llingües d’Asturies (gallego-asturianu y castellán) a la xera d’a diariu. Tien abiertes colecciones de narrativa, poesía, ensayu y investigación, diccionarios, lliteratura infantil y xuvenil, humor, etc. Al empar que presenta cuidaes traducciones d’obres importantes de la lliteratura universal (Odisea), dio a conocer al públicu asturianu autores malapenes conocíos nel Estáu español, como Philip Roth, Georg Trakl o Hugo von Hofmannsthal.
Nel 2019 Ediciones Trabe abre la colección Calume, dedicada a la traducción d’obres de distintes llingües de cultura que son referentes lliterarios o lliteratura d’altor pero desconocida inclusive n’España. Esta colección, amás de ser a crear un corpus lliterariu universal n’asturianu, poner de so parte tolo necesario p’ayudar na profesionalización y dignificación del llabor de los y les traductores.
Nesi mesmu añu «reabre» nel nuevu local de la cai Fernando Alonso, 17 d’Uviéu la Llibrería Trabe, especializada en llibru asturianu.
Nestos trenta y ún años de camín, Ediciones Trabe recibió los premios «García Oliveros» de la Conseyería de Cultura, l´Urogallu de Bronce del Centru Asturianu de Madrid y l’«Andrés Solar» de la Xunta pola Defensa de la Llingua como amuesa del so bon facer en favor del asturianu y de la so lliteratura.
Con más de 900 títulos nel catálogu, Ediciones Trabe ye anguaño una referencia nel mundu de les empreses culturales d’Asturies.
Susana Sela
This work is licensed under a Creative Commons Attribution 4.0 International License.
