Tres d’una charra nel Atenéu la Calzada na que s’informó del conflictu, cientos de persones percorrieron les cais del barriu desixendo l’absolución de les 6 persones condergaes pola so aición sindical
“Esto ye un mensaxe, un mensaxe que’l gobiernu manda a toles muyeres, a tolos obreros: si protestáis, si denunciáis, si defendéis los vuesos drechos, vais presos” declaró una de les afeutaes nes desplicaciones que, megáfonu en man, foron faciendo del conflictu a lo llargo de tol percorríu, recibiendo el sofitu de los vecinos en forma d’aplausos dende les ventanes y les puertes de los establecimientos.
Recordaron tamién que, casu d’afitase la sentencia que considera “acosu” a les concentraciones pacífiques de protesta, taría creándose xurisprudencia, polo que cualisquier persona podría ser encausada por cuestiones que formen parte del llabor sindical, dexando a los trabayaores ensin ferramientes pa defendese de los abusos.
Remembremos que nesti casu les que tan siendo castigaes -con una conderga de 3 años y mediu de cárcele- son les persones -5 muyeres y un home- que defendieron con carteles y concentraciones a una muyer victima d’acosu llaboral y -tenemos que dicir presuntu- acosu sesual, incluyendo la mesma víctima de los abusos. La llucha obrera y la feminista converxen nesti conflictu nel que les implicaes nun tan dimpuestes a dase facilmente; comu se repitió delles vegaes a lo llargo’l manifestamientu “Non, callaes nun tamos más guapes”.
El grupu d’apoyu a Les 6 de La Suiza continuará entamando aiciones de defensa fasta que se consiga l’absolución de les inculpaes. Tola información ta disponible na so páxina web.
Alberto Rodríguez
This work is licensed under a Creative Commons Attribution 4.0 International License.
