Ya nun ye un eufemismu pa falar del turismu xabaz y de baxu nivel, nun ye una frase pa rescamplar la traición política de quienes prioricen los intereses ayenos a los asturianos. Vender Asturies ye en Siero, cenciellamente, una realidá
Siero nun ye’l primer conceyu nin barriu asturianu en carecer la xentrificación, esi fenómenu nel que los foriatos con perres tienen segundes viviendes y cases pa pasar les vacaciones entantu los d’equí nun pueden permitise una vivienda pola xubía de los precios. Sicasí, ye’l primer conceyu en vendese ensin disimulu, por parceles, viviendes o suelu industrial, a gustu del consumidor.
El proyeutu d’Angel García, alcalde de Sieru, sofitáu pola Camara Comerciu d’Uviéu, alcordáu cola Confederación Asturiana de la Construcción (CAC- Asprocom) y perbién recibíu pola Cámara de Comerciu Alemana pa España, representada pol so direutor xerente, Walther von Plettenberg, consiste lliteralmente en poner a la venta Sieru, con Bobes comu destín principal. Ya son dellos los anuncios que pueden vese nes inmobiliaries alemanes pa mercar propiedaes n’Asturies a lo que, pa una economía saneada como la de so, son precios de risión. L’aniciativa ta por espardese a Austria y Suiza ya inclui un serviciu d’asesoramientu ya interprete pa facilitar les coses tanto a los compradores comu a los aboríxenes.
Esti proyeutu va un pasu más allá del turismu de saldu que mos convierte no que vien siendo una república bananera (axallá polo menos fuere república) na que los asturianos vamos tener la suerte de poder ser el serviciu domésticu y la man d’obra barato d’una élite europea.
Llucía F. Marqués
This work is licensed under a Creative Commons Attribution 4.0 International License.
