Xixón acueye’l XV Congresu Biañal de Materiales Compuestos

13 Xunu, 2023

Xixón acueye esta selmana cerca de 1.000 congresistes que vienen a participar en cincu congresos de temes bien variaos

¿Qué tienen en común los rascacielos d’adobe del Yemen, les pales de los aeroxeneradores o delles obres d’arte? Los materiales compuestos colos que se fabriquen. Sobro esta temática xira’l XV Congresu Biañal de Materiales Compuestos (MATCOMP23), que s’inaugura güei nel Palaciu de Congresos de Xixón y qu’axunta a 200 participantes, cerca de 25 universidaes y centros d’investigación y 17 empreses patrocinadores (dende empreses pequeñes familiares hasta nomes grandes como Airbus, Talgo o multinacionales de la traza d’Airtech).

Los composites o materiales compuestos tan constituyíos por dos o más elementos. La so combinación permite crear un material nuevu con prestaciones mui superiores a les que caún aporta por separao. Les sos aplicaciones son variaes y tienen muncha repercusión na industria y na vida diaria. El MATCOMP23 ye un exemplu nidiu de cómo investigación, formación y empresa xúnense ente temes clave que s’apliquen a les industries más variaes: aeroespacial, llocomoción, enerxía eólica y solar, motor deportivu, náutica…

Nos tres días, van presentase les novedaes caberes n’investigación en temes como: recicláu de pales d’aeroxenerador, emplegu de la impresión 3D na fabricación de materiales compuestos, l’usu de la paya d’arroz en materiales compuestos o los recubrimientos anti xelu n’estructures aeronáutiques.

Tres son los ponentes na ponencia principal diaria del congresu, el profesor Constantinos Soutis, catedráticu eméritu n’inxeniería aeroespacial de la Universidá de Manchester, el profesor José María Kenny, una de les persones de más sonadía nel campu de los nanomateriales a nivel européu. Catedráticu de Materiales y direutor del Centru de Ciencia y Teunoloxía de los Materiales de la Universidá de Perugia y l’artista visual Maximilian Pelzmann, que va falar sobro l’usu de materiales compuestos nel arte públicu.

El congreso ta organizáu pola Escuela Politéunica d’Inxeniería de Xixón (Universidá d’Uviéu), l’Institutu de Ciencia y Teunoloxía del Carbonu (INCAR), la empresa Industrial OLMAR, S.A. y AEMAC (Asociación Española de Materiales Compuestos) y torna a Xixón tres 22 años, pol enfotu del catedráticu Jaime Viña Olay, del departamentu de Materiales ya Inxeniería Metalúrxica de la Escuela Politéunica d’Inxeniería, que presentó en tres ocasiones candidatura pal so regresu.

Na presente edición, AEMAC va apurrir dellos premios como’l Premiu a la Escelencia na Contribución Industrial de los Materiales Compuestos entregáu nos congresos de 2019 y 2021 a los asociaos AIRBUS y TALGO.

Amás, esta selmana cellébrense na ciudá otros cuatro congresos, sumando un total de más de mil congresistes: el conceyu VIII PHOTOMEETING FIAP (Federación Internacional de Fotografía Artística) que tendrá llugar nel Hotel Abba pente’l 10 ya’l 16 de xunu, el DATAForum JUSTICIA, que se desendolcará na Llaboral Ciudá de la Cultura, pente’l 14 ya’l 16 de xunu, el X Congresu de Melecina Interna Ignacion Menes, nel Palaciu de Congresos pente’l 16 ya’l 18 de xunu ya les XIV Xornaes de l’Asociación de Profesionales de la Rehabilitación de Persones con Discapacidá Visual, que se cellebra nel Acuariu de Xixón los díes 17 y 18 de xunu.

Alberto Rodríguez