María Fraile ye activista de la campaña dende 2017 y collaboradora del Centre Delàs d’Estudis per la Pau como investigadora voluntaria. Participó na elaboración d’un estudiu sobro la banca armao na Comunitat Valenciana (un anális que quiría amosar una radiografía de la presencia de la banca armao nel territoriu del país valencianu n’estremaos ámbetos de la sociedá.

El vienres 16 a les 19:00 na FAV allugá na Cai Ruta l’Alba, en Xixón,  ufrirá un alderique que baxo’l llema “Tus ahorros, sus misiles” (los tos aforros, los sos misiles) informará sobre la campaña Banca Armada, qué ye, cuales son les sos implicaciones y qué podemos facer al respeutu

¿Puedes desplicanos el conceutu de  “Banca armao”?

E l conceutu de Banca Armao cinca a toes aquelles entidaes financieres que collaboren col complexu militar industrial, financiando empreses d’armamentu , contribuyendo asina a la so espansión y fortalecimientu.

Ye interesante saber que desque s’entamó a investigar esta cuestión dende la campaña, atopáronse estremaes formes d’inversión a la industria armamentista, como la participación accionarial, la emisión de bonos y pagarés, la concesión de creitos y préstamos, los fondos d’inversión y el financiamientu de les esportaciones.

¿Cómu d’estendio ta esta práutica nel sistema bancariu?

Les investigaciones realizaes pol Cente Delàs d’Estudis per la Pau (fixéronse más de 10 informes de magar 2011), amuesen qu’estes inversiones son, per una parte, una práutica xeneralizada na banca tradicional y, per otra parte, que son esenciales pa la supervivencia de les empreses d’armamentu.

Concretamente, la industria militar española tien una media d’endeldamientu de más del 70%, polo que 3 de cada 4 armes nun podríen fabricase de nun ser pola inversión de les entidaes financieres. Tamién destacaría que, cuando falamos de banca armao falamos non yá namás de  bancos, sinón tamién d’empreses aseguraores y empreses públiques (como’l SEPI o’l ICO).

Per otru lláu ye importante saber que dende la campaña tenemos acesu a un volume llindáu de datos, de manera que les cifres que disponemos nun representen el conxuntu de les inversiones n’armamentu per parte de la banca armao. Dicho d’ otra mena, ye probable que dalgunes de les entidaes financieres que nun apaecen nos rankings, tamién tean inversiones, pero que nun dispongamos  de datos. Dicimos siempres que lo que conocemos ye la punta l’iceberg.

Para  que vos faigais a la idega, los datos que tenemos disponibles sobro la banca armao español (entidaes financeras españoles) indiquen qu’ente 2015 y 2021, invirtiéronse cuasi  20.000.000.000 en 25 empreses  productores d’armes.

 Según lo que cuentes, nun sería una desaxeración dicir que retirando’l sofitu a estes banques daríase un reblagu escontra la paz nel mundu

Nesa  llínea va’l nuesu trabayu de sensibilización. La campaña articúlase en redol a 3 exes: la investigación (tolo que te cunté), la sensibilización y l’incidencia político y empresarial. En relación a la sensibilización nuesu envís ye apurrir datos oldeaos y rigorosos qu’informen a la ciudadanía, en cuantes que consumidora de servicios financieros, que los bancos inverten muncho dineru n’armes y claro, ahi falamos del dineru de los veceros.

Como bien dices, daríase un pasu importante a la paz nel mundu. Tamién creyemos que ye importante apelar a la coherencia financiera, ello ye, la correspondencia ente los nuesos valores y lo que faemos coles nueses perres. La mayoría de persones nun quieren que los sos aforros s’inviertan na guerra y nun  falo namás de persones a títulu individual, sinón tamién al ámbitu coleutivu (asociaciones, ongs, alministraciones públiques, empreses privaes).

Ye una reflexón y una toma de concenxa que tien de dase en toles esferes de la sociedá, cuidao que toes tienen, quiera que non, relación con entidaes financieres.

¿Qué pue facer el ciudadanu d’a pie pa frenar esta práutica?

Lo que te comentaba: de magar esta información, faemos incidencia pa que la ciudadanía cavilgue y dexe d’operar con banca armao pa pasase (o dar pasos) escontra les finances étiques (Coop57 sedría una alternativa pa un determináu tipu de servicios financieros, anque t’encamiento que seyan ellos mesmos quienes dean los detalles sobro la so cadarma y natura. Tamien tenemos otres formes de “pasar a l’acción”, como informar sobro estes inversiones (ser axentes multiplicaores) a la nuesa redolada, compartir los estudios y les investigaciones. Tamién podemos actuar direutamente col nuesu bancu: una vegada sabemos qu’esisten inversiones, podemos quexanos (disponemos de modelos de quexes formales que pueden unviase a les principales entidaes).

Tamién pueden actuar en calidá d’accionistes, delegando el so drechu a votu a activistes de la campaña pa que puedan aportar a la xunta d’accionistes y denunciar, nel so nome, les inversiones na industria de la guerra amosando asina’l so desalcuerdu énte’l conseyu d’alministración.

¿Qué ye la Banca ético?

La banca ético ye l’alternativa que proponemos dende la campaña. Creo que nello pueden afondar muncho más les compañeres de Coop57, pero trátase d’entidaes financieres que cumplen con una serie de criterios de non inversión n’industries y sectores dañibles pa la sociedá (comu la guerra). Cunten con sistemes de control y auditoríes sociales pa evitar estes inversiones pero, sobremanera nun son entidaes qu’especulen y de normal operen nel texíu de la economia social. Les sos inversiones van destinaes a proyeutos de lo que podemos denomar “economia real” ello ye, economia non especulativa al traviés d’iniciatives que tienen un beneficiu directu na socied, comu ye, por casu, Fiara Banca Ética.

Alberto Rodríguez

This work is licensed under a Creative Commons Attribution 4.0 International License.