La propuesta d’ArcelorMittal S.A. del Cambéu del Plan Xeneral d’Ordenación d’Uviéu p’ampliar la industria estractiva “El Naranco” plantega invadir la parte protexío del monte.
La cantera entamó la so esplotación en 1964, allugándose na fastera norte del Monte Naranco, na parroquia de Villapérez. Costa d’una superficie llaboriada de 201,31 h, d’una concesión de más de 400 h de distribución este-oeste onde tien escavao una superficie de 3,6 km de llargor y un frente norte-sur variable dende los 240 m hasta los 850 m na so área más ancha. El so cumplimientu de les condiciones ambientales ye irregular y yá tien delles denuncies de la Coordinadora Ecoloxista por esti motivu.
Agora, la empresa pretende que’l Conceyu d’Uviéu autoríce-y incorporar 5,34 h. d’una zona qu’agora ye Suelu Non Urbanizable d’Especial Protección Monte Naranco.
La área d’esplotación que pretenden allugar na falda norte del Monte Naranco, con visibilidá dende los conceyos de Llanera y Les Regueres, ye una zona d’altu valor paisaxísticu y natural que mereció un plan especial qu’agora se quier modificar pa dexar esplotar una zona de montes de carbayos (Quercus robur), fresnos (Fraxinusexcelsior), pládanos (Acer pseudoplatanus), chopos (Populus nigra) y castañales (Castanea sativa), con exemplares de encina (Quercus ilex) y zona arbustiva de sauces (Salix spp.), ablanares (Corylusavellana) y toxos (Ulex spp.)
Na redolada inmediata de la cantera allúguense delles localidaes; Llugarín, Llaínes, Folgueras, Quintana, Villanueva, Nora y la Pedrera, toes elles pertenecientes al conceyu d’Uviéu. Dientro del conceyu de Llanera, les llocalidaes más próximes son les de La Vega y Cadage, que lleven sufriendo décades esta esplotación colos impactos acomuñaos a la mesma: ruiu, polvu, contaminación del aire, aumentu del tráficu pesáu…
Por ello deben estremar les midíes de protección de l’actividá para amenorgar el so impactu na redolada, en vista de los antecedentes de l’actual esplotación y los numberosos problemes que supón tocantes a polvu y ruiu para colos vecinos. L’actual métodu d’esplotación nun favorez l’amenorgamientu del impactu paisaxísticu nin fai posible la restauración y apantallamientu de los bancos una vegada escosos y bona prueba d’ello ye la falta de recuperación paisaxística de gran parte de les zones esplotaes na actual cantera, polo qu’amás de invadir una zona protexida, fadráse por parte d’una empresa que’l so desprecio pola normativa ambiental ye yá patente.
Susana Sela
This work is licensed under a Creative Commons Attribution 4.0 International License.
