@eltiempunasturies

Bonos díes, bona xente.

Alborecemos col cielu nuboso y unes temperatures que tan alrodiu de los 17ºC, rexistrándose nel puirtu Payares 10,6ºC.

Güei seguiremos cola inestabilidá que mos ta apurriendo una vaguada atlantica próxima a la península, anque les tronaes y xarabatos sedrán menos frecuentes y más llocales, afeutando sobre too a puntos de la cordelera con unes temperatures que van camudar poco, calteniéndose un ambiente chornosu.

Mañana llunes paez que la situación empeora y los xarabatos de calter tormentosu van prodigase per toa Asturies, siendo más frecuentes ya intensos, como ye vezu, nel interior asturianu con unes temperatures másimes en descensu ya cola aire que sedrá sele ya variable.

El martes y miércoles la situación sedrá mui asemeyada, con nubes baxes ya estratos na metá norte d’Asturies ya con nubosidá de desendolque que va dir medrando dende la cordelera, pa dexanos xarabatos de calter tormentosu durante la tarde, siendo irregularmente repartios per toa Asturies.

El xueves entama a estabilizase la situación meteorolóxica y ye que la dorsal anticiclónica africana va dir ganando terren, sobre la península y a partir del vienres vamos tener sol y muncho calor, sobre too’l domingu, onde algamaremos los 30ºC na mayor parte d’Asturies, situación que paez va tener continuidá hasta final de mes, pero esto yá lu diremos viendo.

Semeya del nuesu collaciu Fernándo Calvo dende Poo de Cabrales los Urrieles , xenerando nubes de desendolque en díes como güei de inestabilidá.

This work is licensed under a Creative Commons Attribution 4.0 International License.